Deprecated: Function create_function() is deprecated in /usr/local/ftp/irg/public_html/static/zwingli-briefe/pmwiki.php on line 499

Deprecated: Function create_function() is deprecated in /usr/local/ftp/irg/public_html/static/zwingli-briefe/pmwiki.php on line 499
Huldrych Zwingli Briefe - 717

Institut für Schweizerische Reformationsgeschichte

717

<< Nr. 716 | Index | Nr. 718 >> 

Absender: Capito, Wolfgang

Empfänger: Zwingli

Ort: Strassburg
Datierung: 22 IV 1528

Vorlage: Huldreich Zwinglis sämtliche Werke, vol. 9 (Leipzig: Heinsius, 1925) (Corpus Reformatorum 96), 442-443




--442--

Gratiam et pacem. Observandissime frater
Literas tuas per hunc tabellionem aut fratrem, qui has reddidit,
missas diligenter ostendimus amicis, quos modo in tempore salutas;
nam de reliquiis missarum abrogandis modo agitur. "Hoseam"
nostrum, ut meas tentationes cognoscas, lege; nam si quę secus dico,
quam vel res et veritas patitur vel hactenus tractata sunt, id tribue
non animo et ingenio malo, sed infirmo, quod in veritatem inspiciens
aliud non potuit. Observo te tuaque, ut mereris, reverenter, per quem
dominus tanta praestitit.
Lutheri furores, mansueto stilo, quanquam iugulum et, ut tu
scribis, τὸ καίριον petant, duntaxat a te dimoveas. Referire non est
opus, cum sibi maledicentia gravissimum vulnus inflixerit, et tamen
veritati adsis, ut soles, nervis omnibus. Non venditur liber eius. Prestat
et vos paucis agere, in causam nitentes potius quam hominem,
cui opus esse medico videtur; adeo rapitur atra bili. Potes enim pro
ingenii et eruditionis tuae amplissimo modo, dilucido compendio,
peragere. Nam fere pronuntiat orbis pro te et illius quoque sectatores.
Saxoniae agricolae feruntur occulta conspiratione meditari res
novas - scribitur enim 2000 signo baptismatis ceu sacramento et
tessera belli notatos esse, quibus ad flagitium par esse animus debeat - quod

--443--

ego puto fucum esse, quo principes suum quoque euangelium,
id est: tyrannidem et avaritiam, specie euangelii expedient.
Ad Calendas Maias magna es auditurus, quę modo vel indicare
non est integrum.
Dominus nos respiciat.
Vale.
Resthium consulem et scribam urbis cum Fabro surdastro et
bonis omnibus ex nobis plurimum salutabis. Bucerus item te
salutat.
Argentorati 22. Aprilis anno 1528.
Vuolfgangus Capito.
Huldericho Zuinglio, Tigurinorum ecclesiastae,
domino et maiori suo observando. - Zürich.