223

<< Nr. 222 | Index | Nr. 224 >> 

Absender: Wüst, Michael

Empfänger: Zwingli

Ort: Bremgarten
Datierung: 1 VIII (1522)

Vorlage: Huldreich Zwinglis sämtliche Werke, vol. 7 (Leipzig: Heinsius, 1911) (Corpus Reformatorum 94), 551-552

--551--

Salve theologorum decus eximium.
Supparisitabar [!] aliquandiu Gesslero meo, quo pacto meas
nugas homini tam docto, ut nihil supra sit, designarem, quum haec
agens nihil de illo certi propemodum semestris acciperem. Nunc iacta
est alea, Zuingli ornatissime, neve hominem divino praeditum ingenio
ac Christianis nato obtundam, ad rem ipsam pergam. Fecerat me
certiorem Iacobus Aedilitius Chimopolitanus quidam de adulescentulo
Pallados bacca, ut ille tum literis enucliabat [!], condonato;
quem quum tibi commorari recensuit, te, ut eius Maecenatem, alloqui

--552--

decreveram. Affirmabat ille Iacobus hunccine Wittenbergam
profecturum eo animo, ut ubi (quum alibi vigere nunquam non clament)
literas maturas esse audierit; non penitus, ut mihi videor, abs re,
quum nostratium ferme omnis studiosorum ordo illuc perrexerit, ac
mihi id cordi esse ingenue ac libere profiteor. Velim igitur (ne barbarum
diutius Homerum audias) hunccine Hospinianum Leonardum,
non nisi solo Aedilitio notum instigares, ut, quoquo possit
citius, eius animum acciperem, ac bona fide ductum Zuingliano,
hoc est Christiano, animo imbueres, ut Lutherum revisere una phas
foret, id Gellianum subinde pensitans: comitem iucundum in via pro
vehiculo esse.
Vale, Helvetiae numen omnibus admirandum, ac temerariam
hanc meam audaciam aequi bonique consulas, cui familiaritati tuae
obrepere diu collibitum fuisset literis ultro citroque obsignatis.
Iterum vale homo hominum (absit verbo invidia) decus.
Ex Bremgartto meo. Calendas Augusti.
Michael Viestius tibi ad aram usque devinctus.
Salvum te cupit germanus meus frater Iacobus Viestius. Ac
meo nomine Albanum Erhardum canonicum salutato.
Ornatissimo viro Graecae Latinaeque linguę peritissimo
Hudalrico Zuinglio, theologorum omnibus modis summo, sacrae . . .
apud Tigurinos . . . . . o et fratri charissimo.