360

<< Nr. 359 | Index | Nr. 361 >> 

Absender: Zwingli

Empfänger: Vadian

Ort: Zürich
Datierung: 19 I 1525

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 294-296

--294--

Gratia et pax a domino.
Non sinunt, doctissime carissimeque Vadiane, pro siti desiderioque
suo currere stilum occupationes; unde per capita singula notabo.
Libellus noster contra Emserum a Leone traductus est. Excudetur
intra hebdomadas tręis; bene traductum arbitror; nam locis aliquot
obscurioribus me consuluit. Editus est et alius libellus "De seditiosis",
sed Germanice, quem docti per epistolas sic commendant, ut me
ipsorum pigeat; nihil enim unquam utilius prodiisse stolidi adseverant.
Durius adpello; nam quis tandem est, qui hęc, quę illic tractamus,
non videat perpetuo ante oculos fuisse versata? Sed hoc fortasse
precium apud illos auget, quod mordax; hoc verum: omnes malumus
ab aliis cum periculo dici, quam a nobis. Sunt hi plane in secundo
Hesiodi gradu; sed tunc ad primum accedent, qum ea, quę vident
vere dici, student opere implere, obstare vitiis, virtutes serere. Is
libellus, quandoquidem nimirum iam ad vos adpulit, nunc non mittitur.
Edidit sęnatus noster farraginem quandam rerum iam longo tempore
gestarum. Eam itidem mittit vel socer vel amicorum aliquis. Ego

--295--

exemplaria prorsus nulla habeo amplius. Respondi ego ad furibundorum
istorum Helvetiorum obiectiones aliquot, qui mox, ut legerunt,
sic sęviunt, ut omnes Cerberos, Euripos, Diomedes et quicquid
unquam furiit, superare videantur; nam illi ratione aliqua furiunt
modoque; hic modus nullus est, sed fertur barbaries. - Sebastianus
Abtzeller delatus est apud abbatissam, quasi fraude egerit neque
tantis opibus polleat, quantis diximus; qua tamen re non usque adeo
video reddi anxiam, quam quod mutata sententia nunc vult Tiguri
manere, cum antea id sedulo negaverit. Auget suspicionem, quod
nunc perhibet se negociatiunculam suam posse adprobe curare, si
Tiguri maneat: antea vero id strennue negaverit[!], vereturque dolum
subesse, atque ad hoc iam est intenta, quod, si brevi non transmigret
ad suos, et sibi et cognatę illusum esse putabit. Tuum erit hęc omnia
cęlare, sed hac lege, ut Sebastianus ad vos transmigret. Facile
istuc apud parentem verisimilibus quibusdam efficies; nam pręstat dominam
observavisse quam tedio adfecisse. Quę ipsa mecum contulit
de hac re, ut iam capis, ea lege contulit, ut nemo sciat pręter nos
ambos.
Salvos iube omnes fratres; mone insuper, ne de non baptizandis
infantibus tragoedias excitent. Nam nos hesterna die, qua ad obiectionem
eorum respondimus, sic de baptismo disscruimus, ut, qui ęquis

--296--

animis adfuerunt, adserant necessarium esse, ut mundus hanc sententiam
de baptismo audiat. Certum est sic disseruisse, quomodo hactenus
neminem viderimus. Sed dominus iudicabit [1. Sam. 2. 10]. Senatus
super hoc decretum factum est: omnes liberos suos intra octiduum
baptizanto, qui tincti non sunt, aut ex urbe imperioque toto
migranto.
Perstat Conradus Grebelius et pauci alii, hi nullius momenti.
Vale, servetque te dominus incolumem cum uxore et liberis.
Wirtembergensem principem, ut nuper feci, commendo.
Cesarem facilius est non habere vicinum, quam eum, quem possis
superare.
Ex Tiguro 19. Ianuarii MDXXV.
Huldrichus Zuinglius tuus.
Cura perpetuo, quę Iesu Christi sunt.
Ioacimo Vadiano, clarissimo Christi discipulo,
medicę autem peritissimo. - Herrn Doctor Vadiano . . .