Deprecated: Function create_function() is deprecated in /usr/local/ftp/irg/public_html/static/zwingli-briefe/pmwiki.php on line 499

Deprecated: Function create_function() is deprecated in /usr/local/ftp/irg/public_html/static/zwingli-briefe/pmwiki.php on line 499
Huldrych Zwingli Briefe - 458

Institut für Schweizerische Reformationsgeschichte

458

<< Nr. 457 | Index | Nr. 459 >> 

Absender: Bucer, Martin

Empfänger: Zwingli

Ort: (Strassburg)
Datierung: (zirka 7 III 1526)

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 539-541




--539--

Gratia et pax.
Usque Baden Suevorum et Wittenbergensium stupor et
supercilium, ne dicam pervicatia et arrogans fastidium fratrum nos
premit. Struss quidam, de quo fortasse antea audisti, praedicavit
primum Halis prope Pontem Eni, inde Isenaci Thuringiae,
homo, ut scilicet aparet [!], sibi confidens et non tam humanus,
quam vult videri Christianus. Est is nunc Baden. Dicitur
palam pro suggestu Oecolampadium nostrum proscindere, atque
ut a primo toxico omniumque praesentissimo caveant Christiani,
plenis buccis inhortari. Est illic matrona, primi aulae praefecti
uxor, pia admodum et nostrae sententiae, quae potissima caussa
extitit, ut illic hęserit Struthio. Huic hanc refert gratiam, ut,
cuius illam novit sententiae, palam pronunciet hęreticam et prae
caeteris nocentissimam. Vide, ut referant isti spiritum Christi, quem
sibi soli arrogant! Unius diei iter est inter nos, et salutatus non

--540--

dignatur nos resalutare. Brentius ille, olim anima mea, sive curavit
sive permisit epistolam suam quandam ad me parum humanam edi;
cui oportuit respondere; sed ita temperavi rem, ut a contentione
videar abhorrere et ita instituam iter, ne συνοδοιπόρους post me relinquam.
Συμβάλλε, ὅτι βούλωμαι[!]. Pietatis tamen sententiae non
deero. Tua de hac re avide expectamus.
Caeterum ut iterum viduae caussam apud te agam, de qua nuper
respondisti nobis: illi Barbarae nomen est. Patrem habuit Marquardum
a Salgans, baronem, qui plurimum temporis transegit in
aula principis Sigismundi. Huic fuit nepos Georgius a Salgans,
qui habitavit in Ortensteijn, prope Curiam Rhetorum, quam
arcem pater huius nostrae olim extruxit. Matrem vero habuit Margretam
a Ioch, quae familia supra Curiam habitavit. Octennis
fuit, cum commendata fuit coenobio Beraw prope Waltzhudum.
hanc ad se pellexit ante plus minus XII annos domina Catherina a
Zimern, praefecta coenobii vestri. Quae cum non posset impetrare,
licet iterum atque iterum tentasset, ut abbas sancti Blasii, sub cuius
authoritate est illud coenobium Beraw, in translationem Barbarae
consentiret, tandem eo res perducta fuit, ut, si renunciaret suo coenobio,
provisa in vestro, abbas a repetenda illa desisteret. Hinc factum
est, ut domina Catherina cum suis convenerit atque decreverit,

--541--

Barbarae per vitam suam quotannis dare X modios frumenti, quos ait
vos "müth" vocare, X florenos, X amphoras vini (apud vos dici ait
"eymer") cum leguminibus, quantum satis illi esset, quod tamen postea
dandum illi fuit decretum. Caeterum nullae praesentiae, quas vocarunt,
ipsi decretae sunt. Huius provisionis certam ipsam reddiderunt
per literas, item abbatem sancti Blasii, quo ipsam oportuit proficisci
et priori suo coenobio renunciare. Quod et factum est. Huius potest
tibi totam historiam narrare dominus Engelhardus, Schoenbrunner
ac alii canonici illic. Si praefectam roges coenobii, ea illi
cum iniqua sit, nihil aequum respondebit. Sed poteris rescire ab aliis
ita, ut scripsi, illam receptam ab ipsa praefecta et capitulo. Quare
certe aequitas postulat, ut viduae et desolatae non negetur pie viventi,
quod promissum fuit ad obsequium Antichristi, neque debet illi
obesse, quod se matrimonio mature dedidit, aut etiam, quod maritum
habuit parum probatum, de quo, quid tandem experti simus, nuper
scripsi. Oro itaque te per patrem viduarum et pupillorum [Ps. 68. 6],
nam hic vidua est et pupillus, quibus non sit teruntius, ut diligentius
explores, quid illi possit impetrari, et mittemus eam cum literis commendatitiis
nostri senatus. Plane hic nihil minus illi quam cuivis alteri
daretur, et non sumus tam Christianici quam vos. Vere haec mulier
pia est et ipsa inocentia [!]; quam qui negligit, Christum negligit.
In domino vale et saluta nobis fratres, Leonem atque alios,
atque nostrum Pelicanum [!], quem hortare, ut nobis scribat, quomodo
se habeat decucullatus.
Salutant te fratres omnes.
Martinus Bucerus tuus.
Pientissimo apostolo Christi Huldericho Zvinglio,
episcopo Tigurinorum, symmystae charissimo.