482

<< Nr. 481 | Index | Nr. 483 >> 

Absender: Bucer, Martin

Empfänger: Zwingli

Ort: (Strassburg)
Datierung: 17 V (1526)

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 598-599

--598--

Gratia et pax, charissime Zuingli.
Donet tibi dominus praesentem agonem certare feliciter, ut neque
te ipsum ac alios frustra in periculum adducas, neque occasionem
propugnandae gloriae Christi prętereas. Oramus certaminis eventum
quam primum nobis scribas. Hanc viduam, de qua aliquoties tibi
scripsimus, certe dignam tuo ac bonorum omnium patrocinio, qua est
fide et crucis tolerantia, tibi diligentissime commendamus, quae ipsa
tandem, persuasa bonorum consilio, vos petit caussam suam ipsa edoctura.
Non quidem primum apud vos illa facta monacha est, sed illecta
per vestram praesidem, cantus fortasse caussa, atque inducta tandem,
ut suo coenobio renunciarit, constituta ipsi canonica protione, non
primaria quidem, at tolerabili tamen; ac ideo tamen ad vestrum coenobium
cępit pertinere, quare charitas non feret, ut extorris penitus
habeatur. Neque debet illi fraudi esse, quod mature nupsit, quod
certe praestitit fecisse, quam imitatam suas sodales diutius illegitimae
libidini indulsisse. Sed nec mariti culpam decet praestare, quae illi
placuit. Ergo sis huic, quod afflictis omnibus esse soles, quodque
huius integritas et fides profecto meretur, atque effice, ut vel modiculam
provisionem accipiat. Parvo vivere pridem didicit. Omnem
caussam ab ipsa audies plenius. Capito idem etiam literis tecum
agit, nequaquam acturus, nisi haec digna esset, cuius caussa nobis
esse cordi debeat.
Nos tandem etiam catabaptistis incipit dominus probare nondum
defunctis certamine cum papistis, ac simul hostilia expectantibus ab

--599--

iis, quos paulo ante fratres gloriabamur iunctissimos. Heri coram
senatu cum quodam catabaptista congressi sumus, qui ut vir bonus
semper habitus est, ita acerrime nunc nostra condemnat nosque insectatur,
volens baptismo suo semel abluere omnem rem publicam.
Hunc pugnantibus cum reliquiis papae, quinque reliquis missis, dominus
interiecit. Dominus in suam gloriam omnia dirigat, et vos servet
a tantis et technis et insultibus hostium, ac scribe, quam primum
licuerit, ut res vestrae habeant. Peranxii enim sumus. Mathei Zellii
nostri sententiam de eucharistia nuperis literis tibi scribi petebas.
Puto Capitonem id fecisse. Nobiscum conspirat, at coram plebe
tantum usum docet, et se nolle diffinire, quomodo panis sit corpus;
esse multos modos essendi affirmat, quod nobis satis est. Satis enim
intelligitur, quid ipse sentiat, eoque adducta res est, spirituali manducatione
inculcata, et carnis inutilitate evicta, ut signa signa nostri
habeant. Ut nemo a iugo desiliret, oportuit nos hic et in aliis ire,
quo per hunc ac alios potuimus, non quo semper voluimus. De qua
re et Oecolampadius edoctus est. Sed utinam non maior esset ab
alio quopiam, quam ab hoc, remora. Gratias tamen agimus domino.
Adorationem fortiter omnes excludunt, carnem nihil prodesse [Joh.
6. 63], et fidei manducationem solam salutarem diligenter praedicant;
etiam verba Christi ita efferunt, ut re ipsa signum signum esse ac
praeterea nihil satis declarent, teque ac Oecolampadium, praesertim
Mathęus, in colloquiis diligenter defendunt, deplorantes Lutheranorum
hac in re pertinaciam.
Optime vale et Christus reddat te in gloriam suam victorem et
hac vice.
Salutant te nostri. Saluta nostris verbis vicissim symmystas tuos,
nominatim vero Pelicanum, Leonem ac reliquos.
17. Maii.
Martinus Bucerus, tuus ex animo.
Fortissimo Christi praedicatori Huldricho Zvinglio,
seniori suo observandissimo.