565

<< Nr. 564 | Index | Nr. 566 >> 

Absender: Comander, Johannes

Empfänger: Zwingli

Ort: (Chur)
Datierung: (nach Weihnacht 1526)

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 822-823

--822--

Gnad und fryden von gott. Allerliebster bruoder
Inn den nächsten tagen vor Wienacht hab ich fürbracht einem raadt
ze Chur ettlich artickel, dz euangelium beträffend; under welichen des
schuolmeisters halb ich die antwurt empfangen, ich sölle nach einem ge=
schickten frommen tüglichen man wärben; so der erschinet, wellen sy mit
im der besoldung halb übereinkommen; namlich wellen sy ein stür oder
summ geben und dz übrig ab den schuoleren inzüchen, dz ich nit kan
eigentlich sagen, wie hoch sin bsoldung wurde; doch schätz ich's uff 50 oder
60 guldin. Darumb laß dir die sach bevolhen sin mit einem christenlichen
man, der dem euangelio geneigt sy ze dienen. Dem wil ich ouch mit
minem vermögen dienen und dz best thuon. Uond so ee einer kompt, ie
lieber; dann der sterbent hat uffgehört, und wirt man die kinder ietz

--823--

wider ze schuol thuon; wo einer nit bald da wäre, möchte villicho ettlich zuo
den papisten gon.
Item es sind noch wäder götzen noch mässen gar hinwäg; ich hoff
aber, es wärde bald rucken. Dem amman von Flymbs hab ich din
empfälch geschriben; aber mir ist noch kein antwort worden. Der apt
hatt uff den Wienachttag geprediget, Johannes sy der überträffelichest
under den euangelisten, von der jungfrowschafft wägen; damit hab er
verdient, dz er allerhöchest von der gottheit hab können schriben, und sy
im von gott ingesprochen. Aber Petrus hab wol ouch Mathei am 16.
[Matth. 16. 16] dem herren uff sin frag geantwurtet: du bist Christus,
der sun des lebendigen gottes; er hab aber geredt ex exteriore coniectura,
computacione: er hab's ab usswendigen dingen genommen, dz er
in sach vor im ston, das er inn hat sehen uff dem moer wandlen, und
anderen wunderzeichen. Also hat er nit uss insprechen gottes, wie Jo=
hannes, inn genempt ein sun gottes.
Item wie die menschwerdung Christi durch figuren der gsatzt, durch
verheyssung des vatters und schryfften der propheten uns warlich erbotten
und geleistet sy, also warlich kompt er in die hend einß wirdigen priesters
in dem brot im ampt der heiligen mäss, und wär einß lougne, der lougne
dz ander ouch. Das hat er bewärt mit einem kluogen schönen syllogismo,
das alle geschrifften, die da dienen uff die menschwerdung Christi, die
muessen ouch bewären die gegenwirtikeit im brott. Hie wirt nun der
bäpstler sach gwunnen sin; denn die menscheit Christi ist klar uss der
gschrifft Johannis etc. Bys got bevolhen
Johannes Dorffman, din eygner.
Piissimo ac vigilantissimo viro Huldricho Zuinglio Tigurino.