678

<< Nr. 677 | Index | Nr. 679 >> 

Absender: Zwingli

Empfänger: Ulm, Bürgermeister und Rat

Ort: Zürich
Datierung: 27 XII 1527

Vorlage: Huldreich Zwinglis sämtliche Werke, vol. 9 (Leipzig: Heinsius, 1925) (Corpus Reformatorum 96), 338-339

--338--

Gnad und frid von gott bevor.
fromme, fürsichtig, ersam, wyse, lieb herren
Ich hab doctor Ioannem Ecken 30 gesten tags Novembris
vermanet uff die disputation gen Bernn ze komen, hatt er mir uff
24 tag Decembris ein antwurt überschickt (wie wol imm die anstand,
kumpt ouch zuo siner zyt unders liecht) und daby ein gar unerbare er=
fordrung üwer wysheit frommens predicanten Cuonraden Somen.
In dero nit allein ghein wäsenlicher grund, sunder ouch ein söliche
lestrung usgeschreyt, das damit üwer wysheyt, wo die nit so christen=
lich geneygt und gesinnet wär zuo allem friden, seer möchte verwundt
und zuo schwären fürnemen geursachet werden. So nun gedachter Eck
mit sölcher unsinnigheit ye verhofft der vallenden sach des bapstumbs
ze hilff komen, und üwer ersamen wysheyt ouch die frommen Christen
sampt dem wolgelerten getrüwen hirten by üch gdar also usbieten, und

--339--

hiemit minen liben bruoder Oecolampadium und mich als verkerer
der warheyt nennen, so ist an üwer wysheyt min demüotig, undertenig
pitt, so verr es üwren eeren und üwrem predicanten nit nachteilig, ir
wellind Eggen einen fryen platz uftun zuo üch gen Memmingen,
Costentz (unseren lieben burgeren) oder Lindow; wirt einer under
uns oder bed, ob got wil, sicher erschynen, doch erst nach volziehung
des gesprächs ze Bernn. Stande üwer wysheyt mannlich by gottes
wort, so werdent ir die gnedigen hilff gottes sehen. Derzyhend ouch
minem kintlichen, doch yferlichen flyß.
Geben ze Zürich, an sant Ioannis euangelisten tag im nüwen
MDXXVIII. Iar.
Üwer ersamen wysheyt
allzyt williger
Huldricus Zwingli.
Den fürfichtigen, ersamen, wysen burgermeisternn und ratt der statt Ulm,
sinen günstigen, lieben herren.