102
<< Nr. 101 | Index | Nr. 103 >>
Gutachten betreffend Taufe
1526
Huldreich Zwinglis sämtliche Werke, vol. 5 (Leipzig: Heinsius, 1934) (Corpus Reformatorum 92)
[Gutachten betreffend Taufe.]
[Seite 1] So doch der kindertouff von gott nienen verbotten,
sunder in dem allgemeinen wort: "Gond hin und lerend alle völcker,
sy touffende in den namen des vatters und suns und heligen geistes"
[Matth. 28. 19] vergriffen wirt, und die widertöuffer einen underscheid
vom touff der alten und der kinden one gottes wort machend, ouch in
weltlichen rechten nit zimpt, weder uff byspil ze richten noch uff das
nein, dann
[1.] für 's ein volgt nit, als ein gemeine red ist: der ist ein burger,
der sich burgerlich und getrüwlich halt; darumb sind die kind nit
burger, dann sy wüssend nit, was trüw noch wol oder übel halten ist;
dann sy sind nútz des weniger burger.
[2.] Für 's ander volgt nit: das ist nie beschehen; so ist es nit
guot noch recht, das es beschehe. Also volgt weder das erst: "die apostel
habend glöubig und verstendig touft, so habend sy kinder nit toufft",
noch: "sy habend kinder nit getouft, so sol man sy nit touffen".
Dann ietwedre schliessung ist valsch, und muoss man allein sehen, was
zimme und recht sye, nit was beschehen sye; dann die taten sind
so vil fürgehalten, so vil sy recht beschehen sind.
[3.] Zum dritten ermessend sy nit, das der Christen kinder glych
kinder gottes sind als der Hebreier vor Christus zuokunft, und nit
allein die gegenwürtig gloubend (als die widertöuffer valschlich lerend),
sunder dero eltren under die christlichen kilchen gezellt werdend; so
volgt, das sy nútz weniger söllend getouft werden und der kilchen
zuogezellt weder die kinder der Hebreer.
[4.] Zum vierden, das eigenlich volgt: habend die apostel und
erstlichen glöibigen die bschnydung under den Christen nit wellen
dulden, so ist offembar, das sy [Seite 2] ire kinder getouft habend; dann
wo sy allein beschnidten und nit getouft werind gwesen und doch in ire
kilchen gezellt, so hettind sy doch die bschnydung zuogelassen.
[5.] Zum fünften, das ouch Origenes, der hundert und sibentzig
iar nach Christus uffart gewesen, ouch Augustinus anzeigend, das
der bruch des kindertoufs von der apostel zyten an sy komen sye.
Welche gründ wir vest und war achtend, das aber die widertöiffer
nit tuon wellend, doch one grund der warheit, aber nit one eigenrichtigheit
des zangs.