111
<< Nr. 110 | Index | Nr. 112 >>
Ratschlag der 4 Verordneten und 3 Leutpriester wegen der Disputation zu Bern
Zwischen 7. und 11. Dezember 1527
Huldreich Zwinglis sämtliche Werke, vol. 6.1 (Zürich: Berichthaus, 1961) (Corpus Reformatorum 93.1)
[Ratschlag der 4 Verordneten und 3 Leutpriester
wegen der Disputation zu Bern.]
[fol. 1.] Erstlich ist angeschlagen, das unser herren das gleit
lassind in offnem truck usgon von stund an durch all ir gebiet hin
und hinden dran henckind, wie sy umb fridens und ruowen willen ein
zyt har vilen, die dem götlichen wort eben frävenlich widerredind,
übersehen habind. Darumb sye ir meinung, das dieselben, sy sygind
geistlich genannt oder weltlich, sich uff die disputation verfuegind
oder aber ire münd beschliessind etc.; oder sy werdind dieselben nach
gestallt der sach straffen.
Zum andren, das ünser herren gott zuo lob und fründschaft ünser
Eydgnossen von Bernn die disputation mit ratzboten und mit
gelerten nach den eren versehind; und so her Röist sust uff fritag
vor angesetztem tag ze Bernn im rechtshandel erschinen wirt, einer
sye der verordneten botten und doben warte, aber meister Blüwler
und, so es not wär, der stattschriber heimkerind, und demnach einer
vonn burgeren oder einer vonn burgeren und einer vonn räten mit
den gelerten hinuf varind zuo her Rösten etc.
Zum dritten, das ünser herren die gelerten, so hinuf söllend, in
irem kosten haltind, angesehen zuo eim iro der merteils armuot, und
wo man sy nit schickt, sy nit von inen selbs hinuf ziehin, desshalb
ünser herren nit so volkomen erschinen wurdind; zum andren, das
sy merenteils ze fuoss gon und zuo Bernn bym [fol. 2.] Zuingli in
einem besundren hus one muotwillligen unkosten sin wurdind, ob aber
etlich ryten uss notturft irs lybs, beschehen lassind.
Diss sind die gelerten, die tougenlich zuo diser sach angesehen
werdend:
1. Zuingli. Der hatt sich embotten, wo unser herren beduren
wölte am kosten, man inn sinen kosten selbs lasse tragen, doch den
andren ggeben werd. Hatt ouch von einer tougenlichen person anzeigt
mit imm ze nemen.
2. Caspar im spital.
3. Pellicanus, der hebraisch leser.
4. Ruodolph Collinus, der griechischen einer.
Hieby hatt ouch ünseren herren sich embotten her commentúr
von Küsnach. Heisse man inn ryten, welle er guotwillig sin in sines
gotzhus kosten; bedunckt die verordneten erlich.
Herr von Capel hatt sich ouch embotten; wil aber die verordneten
nit guot duncken zuo diser zyt, das er von heimen var; wo er
aber den prior oder schuolmeister oder bed in sines gotzhus kosten
schicke, sye minen herren gedienet.
Item, das in die vogtyen embotten werde, man welle die pfarrer,
die gernn hinuf wöltind uff iren oder irer undertonen pfennig, nit
verhalten, doch das sy daheim ire kilchen wol versehind.