138
<< Nr. 137 | Index | Nr. 139 >>
Ratschläge betreffend Verhandlungen mit Bern
19. bis 22. Mai 1529
Huldreich Zwinglis sämtliche Werke, vol. 6.2 (Zürich: Berichthaus, 1968) (Corpus Reformatorum 93.2)
[fol.3294r] Radtsc[h]leg mit unseren etc. [Eidgenossen und christlichen
Mitburgern von Bern] ze tuon
Ob man die sach mit dem anheben: Die pündt von ort ze ort
harusvordren von den fier Waldstetten.
Oder ob man inen die spys abschlahen und darzuo M. ynnemen, und
so es sin möcht, ouch Brangarten, und mittenzuo im truck uslassen
gon beder stetten handlung an die unschuldigen gemeinden, und doch
in der summ allein dahin langen, das die pensiönischen hoptsächer
und verwirrer abgeton; dann wo das beschähe, wärind wir schon alle
gefridet; wo aber das nit, mit gottes hilff für und für tringen, bis
man des samens entledigot wurde und die sach zuo christlichem
ruewigem end gebracht.
In dem abschlahen den undertonen lassen zuokomen als March,
Höff, Einsüdlen, doch mit dem geding, das nützid wyter
gange. Diennt alles zuo teilung irer undereinander und ouch irer
undertonen wider sy.
Ob man das zevor für die hand neme und mittenzuo pündt harusvordre;
oder die pündt harusvordre, und so die nit ggeben werdend,
erst den abschlag an d'hand neme?
Andrer plätzen halb ynzenemen wirt man bald rätig, wenn sich
vech wurd anheben. Aber hieby vergess man allweg nit, das man
am abt und kloster von Santgallen zytlich ynneme, so vil Luceren
und Schwytz da habend; so hatt man ein'n zerpfennig.
Hierumb hatt man ursachen gnuog.
Das dise radtschleg mit guoter gwarsame unseren etc. antragen werdind,
erstlich den vertruwten, und das des ynnemens gschwigen
werd.
Item das die zwen radtschleg, der ein vom ushervordren, der ander
mit ynnemen, wol mögend zemengebracht werden. Dann die zyt
vor ougen haben, dient zu der sach.
[Auf fol.3294v aufgeklebt] Das ouch, so bald das fendle uszüche,
vogt von Kyburg Keiserstuol ynneme; denn vogt Äscher halt
täglich banggeten und gsellschaft mit Cornelien Schuldtheiss
etc. Denn als die 5 ort tröwend, habend sy demnach gheinen pass me
in ünser land ze fueren.
Andre herschaften ynnemen ist nit not; dann sy sust guotwillig. Ob
man aber sy mit einem sturmme ufbringen welle üns zuozeziehen,
wirt die sach wol leren.