140
<< Nr. 139 | Index | Nr. 141 >>
Randbemerkungen auf den Absagebrief an die Fünf Orte
8. Juni 1529
Huldreich Zwinglis sämtliche Werke, vol. 6.2 (Zürich: Berichthaus, 1968) (Corpus Reformatorum 93.2)
[Randbemerkungen auf den Absagebrief an die Fünf Orte]
[Seite 1] Den frommen, fürsichtigen, wysen schultheyß, rath unnd dem
grossenn rath, so man nempt die hundert, unnd der gantzen gemeind der
statt Luzern, dessglichen lanndtamman, rath unnd gemein lanndtlütch, burger
unnd gantz gemeinden zuo Uri, Schwitz, Unnderwallden ob unnd nid dem
Kernwald unnd Zug mit dem ussern ampt sampt und sunders, fügennd wir
burgermeyster, rath unnd der groß rat, so man nempt die zweyhundert der
statt Zürich, mit disem unnserm offnen brieff zu wissennd: Wiewol unnser
getrüw, lieb Eydtgnossenn unnd cristennlich mitburger von Bern unnd wir
uff den unerbern hanndel unnd offnen puntbruch, den die genempten von
Unnderwallden an yetzernempten unnsern liebenn Eydtgnossenn von Bern,
als sy inen unverwareter eeren inn ir lannd gefallen, beganngen, noch unverichtet
inn offner vechd stannd, unnd sy deßhalb billich, unntz sy sich
mit unns von beydenn stetten gütlich oder rechtlich vertragenn, stillgestannden
sin sölten, habennd sy desterminder nitt hochmüttiger, verachtlicher
wys mit bystannd unnd bewillgung üwer von den überigen vier orten einenn
vogt uff die herrschaft Badenn, da wir teyl unnd gemein an hannd,
gewaltigclich unnd wider inen deßhalb beschechne rechtsbott uns von beydenn
stetten zuo sunderm tratz ufftzesetzen unnderstannden, dessglichen
darvor inn hanngenndem friden mit den Ferdinanndischen zuosambt üch
von den überigen vier ortenn dess willenns, unnsern gloubenn zuo verhynderen
unnd unns mit einem frömbden züg nit alein wider unnsere pünt,
sunder alle natürliche recht von dem unsern ze dringen, ein unfrüntlichen,
nachteyligenn punt gemacht. Zuodem ir von den gemelten fünff orten, so
unnser Eydtgnossenn sin unnd unns billich hievor schirmen sölten, unns unnd
den unsern vilfaltig unbill, gwalt, tratz, hochmuot, schannd unnd schmach
wider recht unnd billichs bishar zuogefügt, unns unnd die unnsern zersgehygennd
ketzer, merhennkyger, mörder, dieben, verrätersch, ketzersch
Züricher, verräters böswicht, offennlich unnd unverschambtlich gescholtenn,
unnser schilt unnd eerenntzeichen an galgen gehengkt [Seite 2] unnd
unns sunst mit mancherley üppigen schannd-, schelt- unnd schmachworten
schanntlich unnd lasterlich angetzogen, die unnseren by üch gebocht,
tratzt, umbstelt, gereitzt unnd on alles verschullden geschlagenn, bluotruns
unnd blowmälig heimgeschigkt, derglichen ouch ir die gemeltenn von
Schwiz her Jacobenn Keyser, unnsern pfarrer unnd hindersässenn zuo Nefftennbach,
inn utznacher herrschafft, da die oberkeyt nit gar üwer, sunder
unnserer lieben Eydtgnossenn von Glaruß unnd diser zit unnder irer bevögtigung
ist, usserthalb üwerer gerichten offennlich wider die pünt, ouch der
graffschafft Utznach statt unnd lanndsrecht gefanngen unnd wider gemelter
unnser lieben Eydtgnossenn von Glaruß, ouch unnser unnd der büderwenn
lüthen der ennden hoch unnd trungenlich ermanen unnd rechts anrüffen
umb göttlichs worts unnd der warheyt willenn gott vorab unnd unns zuo
hocher verachtung elenndclich verbrennen lassen unnd unns sunst vilfaltig
tratz, gwalt unnd hochmuoth wider recht unnd alle billigkeit bishar
bewysen. Diewil ir nun söllichen gwalt, muotwill unnd schmähung allweg on
straff hingan lassenn, dartzuo all unnser vor- unnd nachgeben, ouch kein
billigkeit hellffenn unnd weder göttlichs nammens noch unnserer eeren verschont
worden, ouch unns unnd den ünnsern söllich schannd, verachtung,
gotzlesterung unnd hochmuoth fürer nit ze lidenn, sunder ouch vor gott
unnd der welt hoch verweyslich sin will, sind wir zuo errettung göttlicher
unnd unnserer eeren unnd sins heiligenn worts söllichen ungerechten, bösenn
gwalt uß göttlicher crafft nidertzeleggen unnd ze straffen trungenlich verursacht
unnd zuo rach genöt worden unnd wöllennd, sovil unns gott genad
unnd stergki verlicht, die on witer vertzug mit der hannd unnd gwaltiger tat
an üch rechen unnd sollichen muotwill keinswegs nachlassenn, das wir üch
hiemit heiter ankünnden. Unnd dardurch unnser eer gegenn uch sampt
unnd sunders für unns unnd alle, die unns hierinn anhänngig unnd hillfflich
sin, verwarett habenn wöllennd. [Seite 3] Inn urkund diß brieffs, der
mit unnser statt fürgedrugktem secret innsigel verwaret unnd inn der selben
unnser statt Zürich inn offnem rath geben ist Zinstag deß achtenn tag
brachts im 1500. unnd 29. jar.