141
<< Nr. 140 | Index | Nr. 142 >>
Artikel, ohne die der Friede nicht abgeschlossen werden kann
9. Juni 1529
Huldreich Zwinglis sämtliche Werke, vol. 6.2 (Zürich: Berichthaus, 1968) (Corpus Reformatorum 93.2)
Artickel, one die der bericht nit mag gemacht
noch bestendig werden
Erstlich, das gottes wort fry durch alle ünsere Eydgnossen gepredget
werde nach vermög nüws und alts testaments, aber zuo abtuon
der mess, bilden und anderer cerimonien nieman gezwungen werde,
sunder gottes wort die ding dennen tuege, und alle vereinungen, die
Ferdinandisch und andre, abgeseyt und harusggeben.
Zum andren, das alle pensionen, mieten, gaaben etc. der frömden
herren, verschwornn in die ewigheyt, und die franczösisch vereinig
abgseyt und sölche nimmerme gemacht, nach wyterer form und
maass, wie der buochstab verfassen wirt.
Zum dritten, das die hoptsächer in den fünf orten und die
usteiler der pensionen, von welchen diser zwytracht ursprung genomen
hatt, an lyb und guot gestrafft, diewyl wir noch imm feld sind.
Denn wo das nit beschähe, wurde allweg zuo künftiger zyt verhofft, man
möchte ungestrafft blyben, so man die pensionen glych verschwornn
hette.
Zum fierden, das unseren herren 3000 kronen an iren reiskosten
ggeben. Doch sol den fünf orten dero guot daran dienen, die an lyb
und guot gestrafft werdend, und die von Schwytz tusend guldin her
Jacob Schlossers 3 verlasnen kinden geben.
Urvech
Das alle, so ünsere herren in iren schirm oder sust angenomen,
darumb unersuocht und ungestraft, ouch mit wys ald wort nit gerupft
werdind, sunder inen an ir eer, lyb und guot gantz unschädlich
sye.
Das ouch genannter schirm allweg weren, so verr yeman darwider
tuon wurde, und inen zimmen, mit der hand ze verwerren.
Etc. und was wyter not wirt sin.
Das Zürich by sinen eeren blyben und nimmerme mit inen sölcher
muotwill sölle gebrucht werden, ouch der fünf orten gheins nimmerme
darby sin, da man sich wider sy partyen understat.