32
<< Nr. 31 | Index | Nr. 33 >>
Eine Epistel vor der "Antwort eines Schwytzer Purens"
(20. April 1524)
Huldreich Zwinglis sämtliche Werke, vol. 3 (Leipzig: Heinsius, 1914) (Corpus Reformatorum 90)
Antwurt eins Schwytzerpurens über
die ungegründten geschrifft meyster Jeronimi
Gebwilers, schuolmeisters zuo Straßburg, die er zuo
beschirmung der römischen kilchen und iro
erdachten wesen hat lassen ußgon.
Ein epistel Huldrich Zuingliss.
Huldrich Zuingli embüt allen christlichen
leseren gnad und fryd von got
und unserm herren Jesu Christo.
Sich, frommer Christ, wie den himelschen vatter lustet, siner
götlichen wyßheit liecht vor den wysen und fürsichtigen ze verbergen
Mat. 11. [Matth. 11. 25], unnd das den kindischen erscheinen, damitt
er all weg im selbs glych sye, der da verderbet die wyßheit der wysen
unnd den verstand der fürsichtigen verschupfft [Jes. 29. 14, cf. 1. Cor.
1. 19]; der im selbs ouch den schlechten huffen wellet, damitt er die
wysen zuo scham zwinge [1. Cor. 1. 27].
Hie kempffet ein hafengiesser, der gar ghein sprach noch kluogheit
kan, dann die er von got und siner muoter gelert hat, mit eim
alten schuolmeister, der in vil künsten, voruß des geistlichen retschens
- wie heißt es?: rechtens - verschlissen unnd ußgenutzet
ist. Welcher aber sich uff die götlichen warheit bas verstand und
das gotswort eigenlicher bruche, wirdst du in dym gleubigen hertzen
innen. Darumb lassend darvon, ir gewaltigen diser welt, die leer
Christi ze durächten. Do Christus getödt, ward er durch die
vischer in der welt verkündet und nam me zuo, denn do er lyblich
hie was. Also wenn ir die wenen vertriben han, werdend die hafner,
müller, glaser, tuochschärer, schuochmacher und schnyder leeren. Es
ist ietz an denen; die vischer hand es vor gethon.
Ouch, lieben schueler des Gebwylers, wellend ir des bapstes
unnd der rethorick bericht werden, blybend bym Gebwyler; denn
Hans Fueßli kan nüt darmit. Wellen ir aber die götlichen warheit
clar hören, so zühend von dem retor und kummend zuo dem hafengiesser.
Verstand es ieder imm besten.
Bis hiemit gottes. Des bistu ouch, du wellist oder nit.
Der wirt ouch uß dir
machen ein geschirr
zuo eer oder spott,
wie er wil [cf. Röm. 9. 21]; er ist gott.