44
<< Nr. 43 | Index | Nr. 45 >>
Vortrag vor dem Rat betreffend die Gerichtsbarkeiten des Stifts
20. Dezember 1524
Huldreich Zwinglis sämtliche Werke, vol. 3 (Leipzig: Heinsius, 1914) (Corpus Reformatorum 90)
Als dann propst und capitel zum
Großen Münster Zürich in anfang der reformation
der kilchen, im 1523 jar beredt und angenommen, ire
hohe und nidere gricht noch etliche zyt by handen
behieltend, darus dann mancherley red entstuond, so
ward dieser fürtrag von propst und capitel einem ersamen
rhat Zürich durch Meister Uolrich Zwingli
fürgebracht, zinstags den 20. decembris im 1524 jar.
Frommen, vesten, fürsichtigen, wysen, gnedigen, lieben herren!
Als wir bericht werdend, so verdenckt man uns, wie das wir us
liebe des herschens unsere hoche und nidere gericht zuo üwer ersam
wysheit handen übergeben verzuhind. Das doch nit also ist, sunder
so ettlich gevärden in sölichem übergeben liechtlich erwachsen möchtind,
sind wir darüber mitt flyss und ernst gesessen, und befunden,
das wir hierinn üwer ersamen wysheit räts und hilf notturfftig sind.
Und ist hieruf ünser embieten und beger:
Das wir für das erst geneigt und guotwillig sind, söliche ünsere
hoche und nidere gericht zuo üweren handen stellen und übergeben,
wie dann üns uwer ersam wysheit hierinn am aller fuoglichisten wol
weißt zuo berichten, damitt es formklich ouch ünseren biderben lüten
unnachteilich und unklagbar beschehe. Und wiewol diser handel vormals
ouch uf der ban gewesen, ist er doch all weg guoter meinung
hinder sich gestellt.
Zuom anderen, das es ouch one nachteil zinsen, zehenden, rendten
und gülten des stiffts beschehe. Da uwer ersam wysheit wol mag ermessen,
das, sidmal wir die letsten sind, sölich vorbehalten nit us
eignem nütz komme, sunder us sorg, das by dem Grossen Münster
das belybe, damitt man die bestimpten notturfften der ler und anderer
dingen halb versehen moge. Wir setzend ouch sölicher übergebnus
widerlegung zu üwer bescheidenheit und guete.
Zuom dritten empfelhend wir üns all mitt allem, das ünser stifft
hat, üwer trüw und früntschafft, die wir bishar by üch all weg funden
habend, und erbietend uns als die ghorsamen und willigen in allen
gebürlichen dingen. Wellend ouch zuo üweren diensten all zit guotwillig
und bereit sin.