65
<< Nr. 64 | Index | Nr. 66 >>
Wie sich die Mönche zu Rüti mit Lesen und Hören der heiligen Schrift verhalten sollen
23. August 1525
Huldreich Zwinglis sämtliche Werke, vol. 4 (Leipzig: Heinsius, 1927) (Corpus Reformatorum 91)
[E. II. 341, fol. 3300 a.] Wie sich die münch ze
Rüte mit lesen und hören der heligen gschrift
halten söllind.
So das lob gottes von ünserem mund niemer komen sol, und
aber nit allein kintlich, sunder ytel und narrisch ist, so wir inn loben
mit worten, die weder wir noch andre verstond, wie 1. Cor. 14.
[1. Cor. 14. 2] wol vermerkt wirt, so ist vor allen dingen not, das
die, die ze Rüte yngenomen sind, mit einem, der sy offenlich verstentlich
und wol lere, versehen werdind. Und damit die helig gschrift inen
wol yngebildet und in gedechtnus yngetruckt werd, ist eben als not,
das sy die vil uebind mit züchtigem und gemessem zuohören und lesen.
Uff das söllend die genanten alle morgenn zuo gelegner zyt uff
ein stund on gevar us dem alten testament lesen mit sölcher ordnung,
das sy davor am buoch der gschöpft anhebind und ein capitel fiere
oder fünfe einandren strackts nachlesind, damit der verstand an einandren
hange, oder so vil sy erfindend uff ein stund not sin, und das
mit zimmlicher stimm, nit ze hoch, nit ze nider, ouch rechter
maass, nit ze schnell noch ze träg. Und so die capitel verlesen sind,
daruf on gevor 4 psalmen mit einer stimm (in uni sono), wie man
vormal cursiert hatt, verlesen, und demnach ein tag umb den andren
,Benedictus dominus deus Israel' oder: ,Te deum laudamus', als
in einer stimm; demnach ,Kyrie eleeson' etc., ,Pater noster'; und
demnach die collect desselben sunntags die gantzen wochen us und us.
Und söllend alle tag an dem ort der geschrift und der psalmen anheben,
da sy es des vordren tags gelassen habend. Und so sy das alt testament
und psalter usgelesen habend, da vornen widrumb anheben.
Nach dem lesen soll denn der lerer anheben am nüwen testament
ze lesen, so vil er meint on gevar in 3 fiertel einer stund, oder
zuo sunnentagen in einr gantzen stund, klarlich und verstentlich uszelegen,
und in dem also bis ze end fürfaren untz uff apocalypsim.
Zuo vesperzyt söllend aber die genanten anheben imm nüwen testament
ze lesen ein capitel zwey oder drü nach gelegenheit; und demnach
3 psalmen; am ,Dixit dominus' anheben und imm ,Beati immaculati',
so sy dran kumend, 3 buochstaben für 3 psalmen lesen;
demnach, "Magnificat" oder ,Nunc dimittis' eins ums ander; ,Pater
noster'; und demnach die collecta alle wys und mass, wie obstatt, uff
ein halbe stund.
Nach dem sol der lerer ein stund einen guoten träffenlichen latinischen
lerer, damit sy die sprach wol ergryffind, vorlesen mit den pręceptionibus
grammaticis, wo es not ist.
Es sol ouch genanter lerer mit sölchem ding ufgenomen werden,
das er mit zucht und flyss nit ablasse an imm selbs und andren, und,
wo das nit beschehe, abgesetzt mögen werden.
[E. II. 341, fol. 3300 b.] Darzuo möchtind nach der dryen lütpriesteren
rat erwellt werden Wolfgang Chroil, schuolmeister zuo
Raperschwyl xin, oder Johannes Rällicanus. Doch wer ir
rat von des von Rällikon wegen, das man inn hiehar in die statt
pflantzte. Ist noch jung, hatt aber die anfang der dryen spraachen
wol ergriffen. Deshalb imm und der ler in der statt bas geburte
ze sin.