352

<< Nr. 351 | Index | Nr. 353 >> 

Absender: Oecolampad, Johannes

Empfänger: Zwingli

Ort: (Basel)
Datierung: 21 XI (1524)

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 251-253

--251--

Gratia et pax a deo. Fasciculum hunc literarum ex Argentorato
miserunt fratres. Mihi vix effici posse videtur, ut conspirent
in easdem ceremonias omnes ecclesię, nisi comprovinciales quędam;
neque enim patietur infirmorum ratio et varietas. Profecto non absque
singulari spiritus sancti operatione in illis dissidere mundum existimo;
nam si per omnia in hunc usque diem easdem recepissent
ecclesię, quomodo salva posset libertas Christianorum asseverari,
quam alioqui pseudapostoli [2. Cor. 11. 13] τυραννικωτέρως impugnant?
Nos, qui supra modum hic frigemus et nullum adhuc in abolendis abusibus
specimen exhibemus, non sumus idonei, qui de hac re consulamus;
scripsi tamen de quibusdam mentem meam. Carlstadius libellis

--252--

me non offendisset, si fratribus pepercisset. In his, quę ad eucharistiam
attinent, quantum ipse capio, a nostra sententia nihil abest,
quam in dulcissimo colloquio referebam. Quod morosior est in ceremoniis
non ferendis, non admodum probo. De baptismo parvulorum
libellum nondum legi, nec excusum opinor; sed, quantum ex aliis
intelligo, prorsus tollendum censet; sed nondum subscribo. Augustinus
adhuc retinet me in sententia sua, aliena fide quum datur
sacramentum illis succurri, ne imputetur peccatum originale. De ea
re ubi nactus fueris ocium, pro gratia tibi data vellem copiosius aliquid
traderes.
Ut se res habeant τοῦ ἀρχηγοῦ, ex suis, opinor, accepisti. Excusat
se Farellus coactum se ad sacramentorum administrationem
accessisse; proinde mihi satisfecit. Si vobiscum patronus eius agit,
per internuncium, quę ad excusationem illius faciant, fac resciscat.

--253--

Lucernatium epistolam ad ducem Wirtenbergensem communicatam
tibi esse arbitror. Quid acerbius dici potuit? quid et infirmius?
Salva sit in Christo uxor tua, Leo quoque et Myconius.
Vale optime et fortis in domino.
Basileę 21. Novembris.
Oecolampadius.
Schaffhusium curabis Sebastiano Maier literas suas reddi.
Vdalrico Zqinglio, ministro verbo dei fidelissimo, fratri suo.
Zurch.