374

<< Nr. 373 | Index | Nr. 375 >> 

Absender: Comander, Johannes

Empfänger: Zwingli

Ort: Chur
Datierung: 8 VIII 1525

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 341-342

--341--

Gratia et pax augeantur etc., charissime in Christo frater.
Primum te scire volo tribulationes nostras ac tragoediam, quam
nobis pseudobaptistae illi concitaverunt, ita ut euangelium nunquam
peius audierit, quam nunc in tota nostra Rhetia. Primum
omnes optime institutos verbo ad partes suas traxerunt depravatos,
hoc cauterio notatos, ne scilicet in nostram conventionem unquam
regrediantur, deinde, ut omnes uno ore convitia in me iactitent innumera.
Pars reliqua civium attonita titubat, ac multis euangelium
in fabulam et quasi in nauseam vertitur. Pars tercia papistarum est
in immensum gloriantium de scismate inter nos facto; sed ut mensuram
suam plane adimpleant, huic foco ligna et stipulam administrant,
ut grave oleat; nam abbas sancti Lutii pronotario Curiensi,
cuius uxor rebaptizata nuper proscripta est, adiumento est

--342--

libris et quibuscunque potest auxiliis, ac totus huic sectae a consiliis
est, quatenus me devincant, ipsis quidem, me abacto, plane quoque
illusurus. Pronotarius disputacionem parat acerrimam (ut sibi videtur)
adversum me. Inde sibi gloriosam victoriam pollicetur. Qua parta
omnis res in vado erit. Proscripti residebunt in nidos suos et ego
vices eorum degustabo etc. Fiat voluntas domini. Amen. Caeterum
consilium meum tibi aperio, ut tu melius aliquod feras. Primum sic
statui respondere: me nolle disceptare, hac ratione, quia sepius victi
victoriam nullam parare possint, nisi ubi perdiderunt; nam si ubique
vicerint, tamen victi erunt, nisi Tyguri perditam victoriam recupararint
[!]. Sin autem magistratus omnino voluerit [?], ut disputemus,
assentiam hac conditione, ut fundamenta sua in scriptis deponat. Et
ego contra scriptis respondebo ita, ut omnium pateant iuditio, que
comportaturi sumus. Obsecro igitur, ut te nobis Astyanactem prebeas,
cum res poposcerit, ne euangelium patria et tota Rhetia pellatur.
Si qua graviora obiecta fuerint (utitur enim Andrea magistro), ad
te deferentur.
Vale in Christo firmus.
Ex Chur die 8. Augusti 1525.
Salutato meo nomine Leonem et omnes fratres.
Iohannes Comander, frater tuus.
Piissimo iuxta et doctissimo viro Huldricho Zwinglio,
amico suo observando.