50
Absender: Sanderus, Michael
Empfänger: Zwingli
Ort: Zürich
Datierung: 7 XII 1518
Vorlage: Huldreich Zwinglis sämtliche Werke, vol. 7 (Leipzig: Heinsius, 1911) (Corpus Reformatorum 94), 117-118
--117--
S. D. Quid retribuam pro dono dato libello, non satis scio:
adeo mihi est charus, cum a tua prodierit liberalitate, tum quod purus
vel cardinalis iuditio reputetur, ut velim tibi propterea debere plurimum
annitique pro viribus, ut olim acceptum referam. Interea gratias
et ago et habeo enixe ac etiam atque etiam rogando, ut ignoscas,
quod deposita ruboris macula illum abs te petierim. In causa est
calcographi pertinatia, qui tenatius, quam expedit, ne in lucem exeant,
obsistit, ut forte tunc primum venui exponat, cum a tyneis vel muribus
corrosi fuerint. Cum facta pro infectis haberi nequeant, miror,
quod tantopere trepidet. An credat factum celari posse, quod ad
Gallos et non ad nos deferantur libelli? Cumulat mea opinione sibi
--118--
per hoc potius malivolentiam. Sed de his hactenus. Mihi satis superque
est, quod tua bonitate et liberalitate desyderatum accepi libellum.
Qui Tigurinum sacerdotium Zinlio decernunt, quantum coniectura
capere licet, auctoritate et numero reliquos precellunt. Bono sis animo
Fama nanque ab emulis, ut reor, divulgata, et si quid nausee parturierit,
non tamen bonorum animos avertit. Spero, quod pro voto succedent
deo bene iuvante omnia. Res delata est ad iij Idus praesentis;
tunc enim, ut fama est, ad electionem procedent canonici.
Bene vale et me, ut cepisti, ama.
Reverendissimo es commendatissimus. Tuis verbis salutavi, quos
iussisti, qui omnes suis te salutationibus remunerant.
Ex Thurego VII Idus Decembris 1518.
Tuus M. Sanderus, i. u. doctor, decanus Wratislaviensis.
Doctissimo viro d. Hulderico Zinlio, amico charissimo. Eremi.