591

<< Nr. 590 | Index | Nr. 592 >> 

Absender: Hässi, Heinrich

Empfänger: Zwingli

Ort: (Glarus)
Datierung: 19 II 1527

Vorlage: Huldreich Zwinglis sämtliche Werke, vol. 9 (Leipzig: Heinsius, 1925) (Corpus Reformatorum 96), 54-55

--54--

Myn früntlich, willig diensst und was ich üch erenn, liebss und guotz
könnd bewissenn, soltten ir mich ally zitt gar guottwillig findenn zuovor,
her gevatter meyster Uorich.
Ulls dan üch woll wüssennd ist, wieg dann myn husfrow ietz
nägst wuchen zuo Zürich ist gessin vonn eins grossenn prestens
wegenn, der ir leyder an einer brust zuogevallenn ist, namlich der
krepss, sog hatt sig mich berist (!), das ir irenn vyll guotz hand bewissenn
mit fürdernus und anderem, darumb ich üch grossenn danck sag, mit er=
bietenn, sömlichs altzitt begerenn umb uech zuo verdiennen. Und uff söm=
lichs ist si kertt gan Hinwill und üwer fürdernus im anzögt und innen
irenn brestenn ouch lassenn beschowenn. Sog gitz er ouch für denn krepss.
Und uff sömlichs hatz [!] sig innen gebettenn, ob er irenn wüss zuo helffenn.

--55--

Dog hatt er sich irenn nütt wellenn beladenn und irenn gar abgeseytt.
Uff sömlichs sog hatt der arzennd ein sun, ist ein priester; der hatt irenn
geseytt, er hab for vyll krepss geartznett, und hat inen ouch früntlich ge=
bettenn von ir wegenn; aber ess hat nütz gehulffen. Uff sömlichs hatt
irenn der priester anzögt, er well gebetten sin und hoch geachtt, und irenn
gerattenn, üch noch einmall anzuokerenn umb fürdernuss und noch von
ettlichenn personnen; dieg well er üch durch geschrifft anzögenn. Darumb
ist noch myn früntlich bytt an üch, ir wellennd sog guottwillig sin und
ünnss noch einmal üwer fürdernus an innen bewissenn und von dennen
personnen, dieg üch dann der priester anzögt. Wag ich dann sömlichs
umb üch könnd verdyennenn, wölt ich alzitt guottwillig sin. Ouch hat der
priester geseytt, er well üch schribenn, ob er irenn gehelffen müg oder
nitt. Darumb so bittenn ich üch frünttlich, ir wellennd ünnss sömlichs
berichtten. Nytt men dann: gott sig mitt üch.
Gebenn am Zinstag vor sant Mattes tag im 15 xxvij jar.
Vonn mir Heinrich Hässy, alt seckermeister (!) zuo Glarus,
üwer williger.
Dem fromen, wollgelerttenn meister Uorich Zwingly,
mynem lieben gevatter zuo Zürich.