762

<< Nr. 761 | Index | Nr. 763 >> 

Absender: Bucer, Martin

Empfänger: Zwingli

Ort: Strassburg
Datierung: 26 IX (1528)

Vorlage: Huldreich Zwinglis sämtliche Werke, vol. 9 (Leipzig: Heinsius, 1925) (Corpus Reformatorum 96), 558-559

--558--

Gratia et pax.
Gratias ago plurimas pro responsione tua et Oecolampadii.
Indubie confirmabuntur illis non pauci, neque nulli quoque lucrabuntur,
utcunque illis aqua et igni passim interdicatur.
Pomeranus Lutheri simiam iterum insaniendo contra nos agere
voluit ędita confessione sua de eucharistia, quasi referat adeo multum
scire, quid illi credant, et non potius quid credendum doceat verbum
dei.
Mitto vicissim tibi "Tzephaniah" a me utcunque explanatum.
Non procul a fine de impletione propheticarum promissionum tractavi; id
velim fratrem aliquem faceres tibi legere et de eo tuum mihi iudicium
scriberes. Omnino fidei analogiae adversari videtur, quae de medio
Christi adventu et de terrena ecclesiae felicitate ante aparitionem
domini novissimam futura. Cellarius scripsit, doletque ea adeo Capitoni

--559--

probari. Sed placet domino, ut et dissentientes fratres amemus.
Probe, ut semper, inter nos convenit, et constat vera in domino amicitia,
et si probet ille, quae probare ego nequeo, uti contra ille mea
non potest probare omnia. Satis nocuit nobis Cellarii et anabaptistarum
in hoc viro hypocrisis.
Falsum scripsi de te, fratrum tuorum verbis adductus. Promisi
enim ad hoc emporium accepturos fratres tuum "Ieschaeiah". Vide,
ut fidem hic meam brevi liberes.
Saluta nobis Leonem, Pelicanum et fratres alios.
Argentorati 26. Septembris 1528.
Salutat te Capito et fratres reliqui.
Martinus Bucerus tuus.
Ne offendat, quod in praefatione in "Tzephaniah" non fortius
atque plenius caussam eucharistiae ęgerim. Inservire quorundam nimis
teneris ingeniis volui et declarare, quam abhorreamus nos a tanto dissidio,
quamquam inique nobiscum agat, imo impie, Lutherus. Scio: apud
multos plus illum hoc modo scripti gravavero, quam si illo dignius
scripsissem.
Hulderycho Zvinglio, episcopo Tigurinorum vigilantissimo
et probatissimo, maiori suo observando.