763

<< Nr. 762 | Index | Nr. 763a >> 

Absender: Oecolampad, (Johannes)

Empfänger: Zwingli

Ort: Basel
Datierung: 28 IX (1528)

Vorlage: Huldreich Zwinglis sämtliche Werke, vol. 9 (Leipzig: Heinsius, 1925) (Corpus Reformatorum 96), 560-562

--560--

Gratia et pax Christi tecum.
Diu nullum ad te proficiscentem vidi nuncium, unde Christophorum
nostrum expectare coactus sum, per quem ad te scriberem.
Gratias primum habeo Christo Ihesu, qui tibi in defensione contra
Lutherum sic astitit, ut, quod ille, vel nos contemnens vel parum sibi
fidens, silentium sponte delegit, nunc habere cogatur, nisi se et suos
summa confusione aspergere velit. At nunc prodit Bugenhagius,
illius simia, afferens et ipse confessionem suam ultimam, magisque hoc
spectat, ut de Bucero ac te se ulciscatur, si posset, quam ut firmis
argumentis vos impetat. Me quodammodo vitare ac declinare videtur.
Bucerus pręfando in "Sophoniam", cornu eius fere attrivit, petit
tamen, ut vel ego vel tu illum plene excipiamus. Et mallet quidem
me respondere illi, cui nihil privati negocii cum Bugenhagio intercedit.
At mihi consilium nondum probatur. Nemo enim iustius congredietur
cum illo, quam unus eorum, quos ipse invadit, tametsi in rem ecclesię
ac veritatis esset, neque id molestię detrectarim.

--561--

Interim hic nihil novatum est. Danielem pręlegere cepi, pro
cuius exordio, quum axiomata quędam disputanda iuxta morem scholasticum
affixissem, accidit, sacrificum quendam vidente Thoma
Augustiniano schedam a valvis templi auferre et dilacerare. Ubi cum
illo Thomas expostulavit, quare non magis scriptura sacra perderet et
nos vinceret, mox ille ad arma prorupit, vulneraturus redarguentem.
At noster Thomas, insegnis, praevenit hominem et in terram abiecit,
potuissetque, nisi sibi imperasset, sicarium occidere, sed pepercit. Accurrebant
homines imperantes pacem; tunc Thomas, ut securus, illum et
gladiolum suum reliquit, sed ille, contempta pace publica, arrepto gladio
Thomę, ipsum leviter in capite sauciavit. Vulnus quidem leve est,
sed audacia hominis et facinus temerarium non carent crimine. Hinc
rumor vagus patientiam euangelicam traducit et vana pro veris commemorat.
Nolim autem te ignorare non esse ita a fratre nostro peccatum,
ut male audire debeat, nisi quis defensionem sui corporis a sicario
invadente inter crimina recensere velit.
Cęterum, si Bugenhagio respondere velis, qui libellum suum
Brentio inscripsit, legas, oro, quid Brentius stolide in te scripsit ad
finem fere commentarii sui in "Ecclesiasten", si fortasse et illi temeritatem
suam ostendas una opera, item ea, quae in sextum caput Ioannis
scripsit.
Ioachimum meum sui officii admoneto. Ante multos dies monuerunt
fratres Argentinenses, quomodo marchio Badę inferioris

--562--

decem parochos, pios et eruditos, e terra sua excedere coegit, non ob
aliam causam, quam quod a papistica missa cessarunt. Hi nunc Argentorati
apud fratres morantur. Digni operarii in messe domini [Mt. 9. 38].
Si qui pagi isthic vel per Helvetiam egerent bonis pastoribus, possent
ex illis selectissimi et probatissimi evocari, nimirum Mantelius, olim
Stutgardię aliquot annis propter euangelium vinctus, et Ambachius,
qui Maguntiaci in carcere etiam ipse propter veritatem detentus fuit.
Tales utique viros colligere oportebat. Fortassis Argentinenses etiam
ipsi super hac re literis tecum egerunt; certe voluerunt, ut ego tibi
significarem.
Vale.
Basileę 28. Septembris 1528.
Oecolampadius.
Huldrico Zwinglio, fratri suo charissimo.