195

<< Nr. 194 | Index | Nr. 196 >>

Absender: Myconius, Oswald

Empfänger: Zwingli

Ort: Luzern
Datierung: 5 I 1522

Vorlage: Huldreich Zwinglis sämtliche Werke, vol. 7 (Leipzig: Heinsius, 1911) (Corpus Reformatorum 94), 488-489

--488--

S. Continuis iam sex hepdomadibus laboro tussi et catarro,
ut libros non possim adspicere. Atque is morbus erit mihi, donec
Lucernae vixero. Utinam alibi daretur vivere, ubi aura possem prosperiore
frui. Dicunt medici, si diutius hic permaneam, grandem vitae
porcionem mihi ademptum iri. Volui, ut haec scires; verum quur scribam,
haec causa, cum alioqui sim adeo ineptus. Venerunt duo sacrifici
ad me pridie quam haec scripserim. Ii, nescio quo pacto, inciderunt
in sermonem de te honestissimum, et qui dignus foret, ut in
conspectu meo depromeretur. Alter tandem sic incipit: Fuerunt apud
nos superioribus mensibus duo monachi praedicatores. Illi mira dixerunt
de Zuinglio. Roganti vero mihi ita respondit. Quia rogas, non
lubens dico: suspicio suboritur enim, quia amicus Zinglii es, mox,
ut cognoris, omnia te ei renunciaturum. Tum ego: recte dicis: haec
enim causa, et unica quidem, quur scire percupiam. Ille vero multis
compressis tandem dixit, ut intelligerem monachos effutivisse de pensione,
et quemadmodum absolveris duos dominicastros ab ordine, tum
uti Thomam, qui apud te obiit, nocte et clam sepeliveris. Ego his
auditis risum non potui continere, nescio quo motu; nam impotentius
stomachabar, quod perniciosissimi homines conantur te suis mendaciis
toti mundo facere odiosum. Narraveram, uti res habebat. Mirabantur
illi sacerdotes mirifice monachorum temeritatem, odium, mendacia,
tantorum praesertim, quanti sunt, qui haec blaterarunt. Vis nunc

--489--

scire, quid cogitarim, ubi, quae scripsimus, audivi? Quam sis propheta,
qui omnia haec praevideris! Sed sine eos intrare in aquam,
dum non possint regredi, ut omnes denuo intelligant, quid hoc hominum
genus agat, moliatur et aliquando proficiat in optimum quemque.
Eo die, quo haec signavimus, Bastardus, grandis magister in Francia,
oppidum nostrum intravit cccc. equitibus. Nescio quid fortunae adportet.
Non possum ulterius scribere.
Vale.
Si placet, aliquando scribas mihi de rebus tuis. Valeat Scudus,
familiaris tuus, et alii.
Lucernae in vigilia magorum anno M.D.XXII.
Myconius tuus.
Domino Huldricho Zuinglio suo, euangelistae
Tigurino, amicissimo.