256

<< Nr. 255 | Index | Nr. 257 >> 

Absender: Erasmus von Rotterdam

Empfänger: Zwingli

Ort: Basel
Datierung: 9 XII 1522

Vorlage: Huldreich Zwinglis sämtliche Werke, vol. 7 (Leipzig: Heinsius, 1911) (Corpus Reformatorum 94), 631-632

--631--

S. Humanitatis illud est tuę, mi Zuingli, boni consulere studium
in te meum. Sed ego multos frustra admoneo. Facile ferrem temeritatem
aliorum, nisi hec res gravaret et bonas litteras et bonos viros
et rem euangelicam, cui, dum stulte favent, officiunt adeo, ut, si quis
cupiat extinctam doctrinam Christi, non possit meliorem praestare
operam. Exiit et aliud nugamentum nugacissimum de pontifice. Qui
scripsit, si addidisset nomen suum, fortiter insanisset. Nunc periculosas,
nec minus insulsas nugas absque titulo prodidit. Si tales sunt
omnes Lutherani, mihi valebunt, quotquot sunt. Nihil unquam vidi

--632--

dementius his ineptiis. Nisi me bruma hic alligaret, quovis demigrarem
potius, quam huiusmodi nenias audire cogerer.
Bene vale, mi Zuingli, et rem euangelicam prudenter ac fortiter
gere.
Basilee postridie conceptionis anno 1522.
Erasmus tuus.
Domino Udalricho Zuinglio, parocho Turegensi.