267

<< Nr. 266 | Index | Nr. 268 >> 

Absender: Myconius, Felix

Empfänger: Zwingli

Ort: (Einsiedeln?)
Datierung: (I 1523)

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 1-2

--1--

Huldrico Zinglio Foelix Myconius S.
S. Quoniam tuam humanitatem, Zingli doctissime, eque magnam
esse ac tuam doctrinam omnibus notissimum est, non veritus sum
ego, puer et annis et scientia, scribere ad te, Christianissimum theologum
omniumque litteratissimum. Hactenus te semper ut patrem
amavi, colui, dilexi veritusque sum; certus enim eram meam rem tibi
curae esse. Nunc, cum omnino mecum dissideam, ad te tanquam
amantissimum parentem fugio tuumque auxilium in re admodum seria
imploro, nec haesito, quin mihi opitulaturus sis, postquam meam rem
ordine perceperis. Evolvi hactenus (quantum per ętatem licuit) gentilium
authores non paucos; quos cum exactius perpendebam, animadvertebam,
quam omnino non conveniret Christianum animum in iis
seductoribus versari. Sunt equidem Latini (ut hoc donem) elegantes,
nitidi, exculti summa industria rhetoricesque praeceptis pleni; ac tanta
rursus impietas, nequitia, impostura inest ipsis, ut pius Christianusque
animus mirari satis haud queat. Quare quid attinet vitam nostram
adeo brevem in iis nugis consumere, cum scilicet hodie complures
extent Christiani libri summa cura, industria elegantiaque elaborati?
Nauseant ergo maxime mihi ethnici libri; nempe Christianum animum
magis infitiunt, quam ędificant; contra summe arrident euangelici,

--2--

qui simul lectorem et doctum et probum reddant. Quos cum exacte
ac diligenti studio lectito, invenio, quam omnino labores laudent, otium
vero damnent, et cum sacerdotis unicum sit offitium seminare verbum
divinum, ut apostolus ait [1. Cor. 1. 17]: "Non misit me dominus baptisare,
sed euangelizare"; item Malachias [Mal. 2. 7]: "Labia sacerdotis
custodiunt scientiam"; item apostolorum dux [1. Petr. 5. 2]:
"Pascite quantum in vobis est" etc. Nunc Paulus reiicit novitium:
quid ergo reliquum mihi est, Zingli, utriusque litteraturae non mediocriter
docte, nisi ut et ego me conferam ad artificium, cum scilicet
Christi verba Genes. 3. [Gen. 3. 19] et mihi sint dicta? Si forsan
autem de grege illo essem, qui missi nominantur, haud me praeteribit
dominus, quin mihi [!] iubeat, ut suum seminem verbum. Proin, ter
chare Zingli, summe te obtestor, ut meo persuadeas parenti, quo
permittat, ut discam artifitium vescarque sudore vultus mei; hactenus
enim manibus ac pedibus obluctatus est meo voto. Quamobrem tuum
imploro auxilium. Meum enim ingenium obtusius est, quam quod
debeat diutius bonis institui literis; opera enim et impensa periret;
sacras vero literas e manibus dimittam nunquam, dum spiritus hos
regit artus. Fac tuam hac in re videam opem. Id autem optime
facies, postquam victoriam (quam tibi omnes promittunt) nancisceris
in futuro conventu, quo te meus adibit pater. Quo enim citius devenero
ad artifitium, eo melius.
Vale.
Foelix Myconius tuus, dum voles, voles autem semper.
Domino Huldrico Zinglio, Tigurinorum
euangelistae vigilantissimo, amico ter charo. Tiguri.