301

<< Nr. 300 | Index | Nr. 302 >> 

Absender: Oecolampad, Johannes

Empfänger: Zwingli

Ort: Basel
Datierung: 27 IV (1523)

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 74-75

--74--

S.
Beatum te in Christo, mi Zwingli, qui reddis retributionem
superbae et miserae Babylonis filię clamanti per singulos dies suis:
expugnate, expugnate usque ad fundamentum [Ps. 137. 7 f.]! Non credit
stulta illa, quod dominus confortarit portas Sion [Ps. 147. 12f.], et
quod imbelles omnium consiliorum machinae adversus dominum. Beatum
te, qui pio zelo ad petram parvulos eius allidis [Ps. 135. 9]! Certa
est victoria, quoties auspiciis et ductu Christi adversus incircumcisos
et alienigenas bellum suscipitur et geritur. Benedictus ipse deus,
doceat manus tuas ad bellum [2. Sam. 22. 35], et digitos tuos ad
prelium! Porro et nos nuper manum ad aratrum aliquanto diligentius
admovimus [Luc. 9. 62], inventique sunt adversarii multi, simul

--75--

atque apertum est ostium [1. Cor. 16. 9], sed quibus nihil ineptius; id
quod te ex aliis cognovisse reor. Bene vertit deus negocium variisque
modis ostendit impressionem in illos impavide faciendam et
neutiquam respiciendum. Bona spes fulsurum diem more insolito,
quoad obterantur omnes, qui blasphemant sanctum Israel [Jes. 1. 4].
Interim quoniam in hunc usum positi sumus, tantum absit, ne nobis
timeamus, ut et minas et maledictiones et opprobria et calumnias, et
quicquid id genus nobis oggerunt, non solum non rideamus, sed et
benedictionum loco suscipiamus, confirmati ab eo, qui beatos nos
dixit, si omne malum verbum adversus nos dixerint, mentientes,
propter Christum [Matth. 5. 11]. Dolent Pharisaeorum filii decedere
aliquid suo fastui, non attendentes, quod regis gloriae nomen benedicitur;
sed vellent, aut certe non curarent, si nomen fortis Israel
contaminaretur in gentibus. Unde audendum et infatigabili conatu
non dormitantibus hostibus obluctandum. Videmus messem multam,
operarios paucos [Matth. 9. 37]; nam numerosos illos ignavos ventres,
qui verbis quidem ędificare se dicunt, re autem ipsa demoliuntur et
seminant zizanias atque id genus, ne non operentur; sunt enim et
iniquitatis operarii. Precare dominum, ne nos a pueris suis abiiciat
detque etiam nobis vel infimam in domo sua ministerii sortem. Uror
enim, quum plebem video aliorsum rapi. - Fabri robur, quam sit
contemnendum, iampridem expertus es. Nec terrebunt miserabilis
senis ausus lapsantem deliriorum parietem linituri, imo nulli timendi.
Vel ego fallor, vel in omnibus castris eorum metus ac trepidatio.
Vellem quidem sępius nos literis inviseres, quandoquidem colloquium
negatur. Sed si tanta sunt negocia, boni consulendum, etiam quod
necessitas permittit. Crescere te faciat et benedicat tibi ecclesiaeque
tuae in seculum.
Salutant te Nepos ac Cratander.
Basileae XXVII. Aprilis.
Tuus Ioannes Oecolampadius.
Huldrico Zwinglio, presbytero Tigurino,
in euangelii ministerio omnium diligentissimo, suo fratri.