306

<< Nr. 305 | Index | Nr. 307 >> 

Absender: (Oecolampad), (Johannes)

Empfänger: Zwingli

Ort: Basel
Datierung: 16 VI 1523

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 90-91

--90--

S. mi frater. Causari et ego non modo possum, sed et cogor,
negociorum varietatem obesse, quo minus ad te scribam, quę etiam
te moratur, ut scribis, ne, quantum cupis, ad scribendum pręstita occasione
me provoces. Verum, quoniam non nostra, sed Christi sunt
negocia, absolvi meremur uterque, maxime si nulla aeque piarum et
insumendi tempusculi damna rependentium rerum obveniant argumenta.
Me sane cum Christianorum omnium tum tuae literę oblectant mirum
in modum; sed eas exigere non ausim a quopiam, si id non et e re
sit aliorum; cupio tamen id genus solatiis, si fieri commode posset,
non destitui omnino, atque tu pro tua humanitate, ita mihi persuadeo,
huic officio non deeris. Nolim enim et ego, ubi permittit opportunitas,
neglectae caritatis in hoc accusari. - Porro quod de vicario scribis,
eum facere excudi librum nescio quem adversus te, nihil de ea re
mihi constat. At tuas lucubrationes miro ardore et videre et legere
desidero; nam ex problematum unguiculis, quale corpus futurum, coniecto.
Tibi quum summum veritatis defensandę est studium, nihil
utique imminet periculi ab infelicibus illis tectonibus et eorum empticiis
operis; quare prudenter ac recte facis, qui magno animo, quasi
intra sanctam urbem, cum Ezechia [Hiskia, bezw. Jesaja, 2. Reg.

--91--

19. 6, Jes. 37. 6] blasphemabundos Rabsaces, munitus fide in domino,
non metuis. Discerpunt et me obtrectatores mei et insignibus
mendaciis me traducunt et hominem alioqui ad captandam hominum
gratiam minime felicem invidiosum reddunt, idque unum faciunt, cum
pręterea grassari latius nequeunt [!]. Porro nostrum fuerit bene precari
atque illos Christo commendare, ut tandem posita ira illorum
misereatur. Illas enim preces, τῷ θεοδιδάκτῳ loquor, potissimum amat.
Ulrico ab Hutten, equiti clarissimo, fasciculum hunc reddi
cures oro. Buceri causam tibi commendarem, nisi te scirem
φιλανθρωπότατον. Hominem si iuvare potes, iuva obsecro. Ego
mancus sum, manum porrigere nequeo; nihil alioquin eius nomine
facere detrectarem. Ingenio, eruditione, ardore, constantia multisque
aliis nominibus euangelio prodesse potest.
Vale mi Zwingli et cresce in gentem magnam [1. Mos. 12. 2] in
Christo
Salvum opto Ceporinum et Leonem atque totam ecclesiam
tuam, quę Christi.
Basileę 16. Iunii anno 1523.
Vlrico Zwinglio, Tigurinę plebis fidelissimo doctori,
suo charissimo in Christo fratri.