372

<< Nr. 371 | Index | Nr. 373 >> 

Absender: Bolt, Ulrich

Empfänger: Zwingli

Ort: Fläsch
Datierung: 6 VI 1525

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 335-336

--335--

Ihesum pro salute etc.
Lieber bruoder Ulrich, ich danck dir der buecher, so du mir geschickt
hast; wo ich 's möcht umb dich verdienen, welt ich bereit sin. Ǒch andrer
guothet, so gott durch dich mir bewisen hat, ist mir nit müglich ze ver=
gelten, sonder der dich leydtet, dem sy es bevolchen. Ǒch, lieber bruoder,
wüss, das ich dir zuo dem dritten mal geschriben; nit bin bericht worden,
wie es umb dich, din hußfrow und gancz gesind stand und all unser
bruoder und schwester in Zürich, denn allein wie du mir geschriben hast
uf die antwort der arthycklen Valtin Compar, wie du min fürsorger
syest. Des ich mich mercklich tröst, wiewol mich die biderben lüt hand

--336--

ufgenomen ein iar, und aber byshar gross ufblosung und trowung,
widerstand mit grosser gevarlikeit, bliben und erlitten, und aber iecz in
hoffnung, es werd ie lenger ie me zuonemen. Das Prethygöw ist gar
gevallen; werdent dich die zöger dis briefs wol berichten. Wo aber du
mir möchtest helfen gen Zürich oder in irem gebiet, welt ich nach allem
minem vermügen umb dich verdienen, namlich soverr es möcht geschechen
on abbruch des götlichen worcz. Laß mich dir bevolchen sin alle zit, wie
ich dir, oder got in dir, vertrüw.
Gruocz mir din hußfrouw, ǒch Hilarium, Barblen, Wilhem [!],
Änderlin, mit allem sim hußxind, und Löw Jud, desglichen den lüt
priester, sin hußfrow und all unser brueder und schwester in Christo,
meister Casper, Cuonrat Luchsinger, Cuonrat Rolobacz etc. Ǒch
bit ich dich, wenn die materi vom ußschluß des nachtmals, als der lastren
ußzeschliessen der gemeinschaft, von rätten oder burgren nachgelassen und
truckt ist , mir lassest werden, und ob du wüssest, ob min bruoder getödt
sye, oder wie, mich lassend wüssen. Nit me denn: got sy alle zit mit üch
allen, amen.
Geben uf Zinstag in Pfingsten im xxv iar der mindren zal.
Hulrich Bolt, verkünder des goczworcz ze Flesch,
din williger levith und bruoder in Christo Jhesu.
Dem fromen glerten von got Hulrich [!] Zwingli,
verkünder des goczworcz zuo Zürich, minem mitbruoder in Christo Jhesu.