380

<< Nr. 379 | Index | Nr. 381 >> 

Absender: Farel, Wilhelm

Empfänger: Zwingli

Ort: Strassburg
Datierung: 12 IX 1525

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 354-356

--354--

Gratia et pax a deo, patre nostro.
Si unquam sese obtulit lętitiae et gaudii ratio propter persecutiones,
eiectiones et ficta in pios mendacia ob Christum [Matth. 5. 11],
nunc quam maxime. Nam quid, quęso, intentatum relinquunt impii?
Scire velim vel unam rimulam superesse, qua pios aggredi possint, quam
non sin perscrutati. Verum si deus pro nobis, quis contra nos [Röm.
S. 31]? Gratulor tibi hanc tuę fidei probationem et perseverantem in
te Christum, per quem stas, immo ęternum perdures, gratiam agnoscens,
quanta in te sit, ac tuas vires Christo et divinę gratię, quod
suum est, tribuas tuisque viribus, quod oportet, ut sit deus deus et
homo homo. Ea sunt tempora, ut ab amicis sit quam maxime timendum.
Per inimicos pius nunquam deiicietur (quicquid sęvi moliuntur

--355--

hostes, nobis in bonum cedit), nec contumeliis superbit nec intenta
sibi morte se fidit. Suspirare ad patrem docent persecutores, unde
mira dei et bonitas et clementia in filios agnoscitur, qui, cum preciosum
illum gestent thesaurum in vasis fictilibus [2. Cor. 4. 7], pressuris
adiguntur, ne temere perdant; quas qui fugiunt nolentes Christi crucem
ferre, quid malum cęcitatis et impietatis non incurrerunt? Videmus,
quam foede non pauci a Christo ad Antichristum defecerunt,
dum ventri magis et quieti student quam glorię dei [Röm. 16. 18]. Prius
horrenda ob oculos erant, quę et nunc sunt, divinę ultionis irę exempla,
de quibus an resipiscentię aliqua sit spes, nescio; videmus, quid sit
veritatem dissimulare, deo et hominibus una inservire velle, in quot
protrudat foedissimos lapsus; quid denique non suscipiat defendendum,
quam difficile errorem aut fateatur aut agnoscat nominis parandi
amor aut retinendę autoritatis studium. Sunt, quos nemo non putasset
ipsissimum spiritum, qui tamen toti in carnem abierunt, secum non
paucos pertrahentes in perniciem; qui utinam a se abducissent [!] populum
in verbum dei!; non tam multos perire videremus. Quod cum
te non fugiat, fratres admone non eferri [!], sed cum timore verbum
ministrare reputareque apud se, quid aliis obtigerit, ut omni cura
videant, ne cadant [1. Cor. 10. 12]; quod non dubito te et facere et
facturum sic, quod nihil hominibus tribuatur quantumcunque piis et
doctis, sed soli deo omnia. Vides enim, quantum obsit pietati humanę
existimatio larvę, quam difficile plurimi per hanc ab errore avocari
possint. Contigit eo die (nec multum puto horam diversam, nox enim
erat), quo tibi amici bona intentarunt, et Vedasto brachium spiculo,
quod allabardam vocant, transfodi. Hunc, quem pietas et animi mititas
alieque Christianę dotes commendant, optarim in Novoburgo
concionatorem, si fieri posset, aut alias puerorum moderatorem agere.

--356--

In qua re spero te nonnihil posse, cum pręfectum dicant pium esse.
Adnitere quęso pro viribus, ut hac via misęre Gallię aliquid suboriatur
lucis! Non est, quod dubites de viro; nam nihil in eo desideres,
quod ad id muneris faciat, quantum hęc ferunt tempora. Si certior
fieri vis, nemo hic episcoporum est, qui illi pium non ferat testimonium.
Audisti, ni fallor, de immaturo Papilionis transitu, super quo gestiunt
impii. Christo sit gratiarum actio, qui suę pietatis nos intueatur
oculis. Tyrannidem non parvam apud Gallos suspicor, quod fratres
magis sunt muti quam pisces. Commendatum habebis, et tecum Myconius,
Petrum, Bleti nepotem, quem gaudeo apud Coeporinum
agere. Faxit deus, ut dignum pręceptore tali pręstet discipulum
Gratia dei tecum.
Salutem dicito Myconio, Leoni et Gaspari. Salutant te
Capito, hospes noster, et Bucerus ac Vedastus, hospes etiam
Capitonis. Cum Francisco non per omnia convenit. Pęnitentia
forte meliores faciet, quos pręclara sui opinatio reddidit insolentiores.
Vale.
Argentinę 12. Septembris 1525.
Tuus in Christo totus Guilielmus Farellus.
Vigilantissimo verbi dei ministro Huldrico Zynglio,
episcopo Tigurino. - Tiguri.