400

<< Nr. 399 | Index | Nr. 401 >> 

Absender: Capito, Wolfgang

Empfänger: Zwingli

Ort: Strassburg
Datierung: 28 X 1525

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 404-406

--404--

S. Recantavit Carolstadius specie declarationis sententiam
suam super materia eucharistias [!]. Sancte iurat se invito, quę scripserit,
in vulgus exiisse, neque quicquam definiisse, ut cui duntaxat consilium
fuerit cogitationes suas incertas, causa inquirendae veritatis, in medium
protulisse. Lutherus huic agenti supparasitatur, qui agnoscit inscriptiones
opinantis citra assertionem esse. O viros vere euangelicos
Nam Carolstadius ad extremum iudicium domini provocavit, Lutherus
illum commeritum publicum supplicium neque hominem esse, sed
prorsus agere cacodaemonem asseveravit, et tamen remiserunt uterque

--405--

iuxta illud: Habeto benevolentiam cum adversario cito, dum es in via
cum illo [Luc. 12. 58]. Nam appellatum iudicem antevertunt. Patrono
Carlstadius, opinor, usus est ventre sagacissimo [Phil. 3. 19], cuius
res eiusmodi declaratione gesta est. Bene cecidit; stolida arrogantia
miras illius excitavit turbas, quas turgentes componit pacificus venter.
Tu vafro commento perstringeris ab utroque, quod incertum tibi proposueris
et quod eodem, quo Carolstadius, argumento connixus sis.
Nos edemus ridiculum istum libellum, quo se, quales animo sint, illi
magnifici ipsi declararunt. Addemus scholia idonea cum pręfatione ad
praemonendum lectorem neque tui obliviscemur, tametsi nostro non
indigeas subsidio.
Caeterum, charissime frater in domino, visus es Bucero et mihi
admonendus eius industrię, cuius es alioqui observantissimus, nimirum
ut moderata constantia scribas, quę in posterum scripturus es, nihil,
aut quam minimum poteris, stomacho tuo indulgens. Quo pacto, uti
causa sumus, ita modestia quoque superiores erimus. Videmur obtinuisse
articulum fidei necessarium non esse neque Luthero ipsi
deum impanatum; qua libertate facta quid obstabit amplius, quo minus
auferamus sententiam? Pomerano libere ac diligenter scripsimus.
Quas literas haud dubium omnes alii viderunt Witenbergenses.
Quid responsuri sint, auguror. Eius responsionis te faciemus extemplo
certiorem; nam his diebus istinc ad nos iuvenis quidam redibit. Palatinus
elector cum tota ditionis suae nobilitate pro verbo decrevit;
liberumque fecerunt et loquendi et agendi arbitrium iuxta scripturam.

--406--

Talibus praeiudiciis conventus Augustanus occupabitur. Ad Ferdinandum
hinc magnifici pectoris virum Christianum brevi mittent;
agetur etiam quiddam de verbo. Aula multum ad cognitionem veritatis
accedit. Tantum oramus, ut dominus ministrorum verbi dissidium
abstineat, qua peste nihil video fore pernitiosius. Video tamen cogitationes
quorundam ad contentionem spectare, quibus mentem precor
meliorem. In Palatinatu sunt, qui subscribunt sententiae tuae, qui
purissime sentiunt de cęna domini.
Vale.
Argentorati 28. Octobris anno 1525.
Volfgangus Fabritius Capito.
Bucerus et Hedio te plurimum salutant in domino. Amicissime
te iubet valere Farellus, eximii iudicii vir atque observandissimus [!]
Zvinglii, Miconium, Leonem Iud. Ac ecclesię toti nos nostramque
commendes.
Huldericho Zvinglio, episcopo Tigurinorum,
amico et fratri charissimo.