428

<< Nr. 427 | Index | Nr. 429 >> 

Absender: Capito, Wolfgang

Empfänger: Zwingli

Ort: Strassburg
Datierung: 27 XII 1525

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 475-477

--475--

Gratia Christi tecum, fortissime heros.
Plurimum solatii litere tuae attulere nobis de tua ecclesia sollicitis,
qui timebamus nescio quid humanius casurum in pectora infirmiora ob
lapsum Waltzhutanorum. Vicinię enim malum nos vehementius
attingere solet. Verum tantum abest, ut aliquid vobis discesserit, ut
et nostram pariter ignaviam istinc subfulcias. O charissime Zvingli
quam semper trepidavi de Baltasare, quoties arctissimis amicis de
homine dubitanter locutus sum, quoties dubitavi de animo gloriosuli
siquidem notus est ab annis multis magis, quam ulli bono probatus.
Nunc primum, quia concutitur adversis, in spem venio, hominem vere
dei esse, qui per praesentes afflictiones apparatur, expolitur, absolvitur;
modo furiosam rebaptisandi pervicatiam et impotentem, qua vehementer
laborat, philautiam deponat. Det dominus, ut in gloriam suam omnia
De Waltzhutanis in spe sum, in locum eiectum verbum dominus
restituet, quia coherescere quorundam pectoribus nihil dubito auditum
Christum, qui ociose non latitabit [Matth. 10. 26]; erumpet olim cum
cautiore fidutia. Illa modo via dissidium excluditur, quod ex tuis literis
agnosco peius extitisse praesenti clade. Gratia deo! nostram ecclesiam
eius generis tragoedia necdum tangit. Verum aliquid monstri quidam
alunt, quod nuper effudissent, ni metus externę persecutionis prohiberet.
Eos facere nostros quotidianis officiis conamur. Quod ad constantiam
nos hortaris, habeo gratiam. Cohortatione tali opus est, non omnibus,
fateor, infirmis tamen maxime conducunt, imo et firmi gaudent audire
alibi similia dedisse pectora dominum. Vanissimos hic terrores spargunt,

--476--

quasi nostra fides formidabilis esset eximie Satanę. Scimus nasci
domi nostrae omnes hos rumores; et sunt tamen, qui nostrae reipublicae
malevolunt; sed incutere mala hoc tempore an satis commode
poterint, necdum scio. Adeo habent, quo per hanc ęstatem exercendi
videntur. Novi et plebis mobilitatem; sed anchora nobis Christus
est, eoque intrepide pergimus. Waltshutana defectio ne pilum
quidem nos turbat, imo sentio grandescere fidem in multis. Enscheimenses
pergunt pios trucidare, et Elvetii nostri tantis pestibus
favent. Dominus eos dissipet ac perdat
Cum pharmacopola conveni, qui plane probus ac integer est.
Sedecim aureos pro victu poposcit. Neque alibi uspiam minus dari
solitum asseverabat. Hominem verum putamus, et ei ministro non esse
opus scimus. Eoque suscepi ad te scribendum; tuum erit respondere,
an bono viro hęc conditio probetur, nec ne. Nam quod pharmocopola
de fideiussione petierit, per me agetur. Fidem dabo pro iuvene commendato
per te perquam libenter. Fere exciderat: ad biennium locandus
erit; nam ait, minori tempore nihil commode fieri posse.
Qualis vir sit Ioannes Burkardi, ex iniecta schedula facile
cognosces, tametsi ἀπόῤῥητα monasticę vitae nihil attigerunt illi, qui

--477--

hęc suggesserunt. Pręcipuum, quod per Martinum Herlin probari
potest, furtum est frumenti et aurei cruciati. Nam civi, qui adhuc
vivit, mira fraude imposuerat et in aliqua summa frumenti defraudaverat;
totum, quod abstulerat, reddidit, coactus manu illius. Neque
ei tutum esset hic agere, nisi permutata veste. Raperent eum sui
adversarii in ius.
Bucerus anno superiore causa parandi victus Pomeranum
vertendum receperat. Tedia multa devoravit. Vertit. Excusus est
liber Basileę. Quam studium hominis Wittenberga probatura sit,
experiemur brevi. Certe quedam meliora reddidit, et nunc in hoc est
idem, ut exquisitiora colligat. Verum, mi Zvingli, oro plurimum,
quam fieri potest, frigidissime agas, si quid agendum adversus γραφοτυράννους
τοιούτους. Modestia et causa nitamur, sicut ipsi autoritate
et opinione eruditionis.
De Baltasare, quem tecum captum aiunt a magistratu liberali
detineri custodia, speramus felicem exitum. Iustitia et charitas in
talibus iudicibus locum habent neque deserent indefensam causam veritatis.
Et omnino consultum arbitror, ut nihil, quod severitatis etiam
iustę suspicionem habeat, cum eo tentetur. Gloriosuli illi norint
clementiam Christianissimi magistratus. Gravatus hęc multis scribo
tamen. Tu boni consule.
Argentorati 6. Kalendas Ianuarii anno 1526.
Vuolfgangus Fabritius Capito.
Observandissimo fratri ac maiori suo Huldericho Zvinglio,
episcopo Tigurinorum etc. - Zürich.