457

<< Nr. 456 | Index | Nr. 458 >> 

Absender: Capito, Wolfgang

Empfänger: Zwingli

Ort: Strassburg
Datierung: 7 III 1526

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 537-538

--537--

Gratia Christi tecum, fidelissime frater.
Diligentiae tuae gratiam habeo. Literis ad me pro capto fratre
usus sum. Grata est salus per te nunciata. Mitiores habiturus est
iudices, si rem ad iudicium deducent adversarii; quod facturos minime
credo, propterea quod atrocissima accusatione persequi citra testes,
imo reclamantibus passim omnibus, perquam difficile hic erit. Mutatę
sunt hominum opiniones. Pridem habebatur sceleratissimus, modo vir
iustus, ut est, melioribus videtur. Profuit magnopere gravissimum
tuum testimonium.
De moniali Bucerus totam fabulam scribit, et commendatitias
a senatu nostro. Pia foemina est. Utinam per occasionem adiuvari
possit! Dabis operam pro misera. Divitię huius reipublicae a multis
celebrantur, sed revera sunt intra mediocritatem.
Cum agricolis vestratium tolerabilior propediem ratio erit. Hoc
etiamnum tempus est perturbatius. Florebunt pię respublicae, quatenus
coniectura consequi possum. De Gallo et caesare consentiente
magnas spes meditantur adversarii, quos dominus perdat; contra vero,

--538--

si novi iudicium domini, non multum me fallit, quantum Antichristo
ex ea concordia mali sit eventurum. Nam Galli piissimi modo ad
iter se accingunt obviam ituri regi et nomine eiectorum Christianorum
ęquissimas conditiones postulaturi. Bene sit. Nós semper
morimur et tamen vivimus [2. Cor. 6. 9]. Illi de salvatore et salute
impotenter gloriantur et tamen indies etiam atque etiam pereunt.
Quid Suevię et huius viciniae concionatores meditentur, habes ex
Buceri literis. Nos contra dabimus operam, ut optimum quemque
nobis aggregemus, siquidem domino visum est, ut scindamur, tametsi
nos in unitatem fidei, citra animi vitium, volente Christo colligemus.
Bucerus epistolę Brentii respondit. Non video contendendi finem.
Oro dominum, det nobis fortiter, si usus foret, persistere, sine quo nihil
possumus.
Literas senatus ad vestrum celeberrimum senatum pro Barbara
illa monacha mittimus. Fac miserę, quod officii nostri est. Pro tuis
vices reddemus, ubicunque dabitur.
Iodocus Brenwaldius commendatissimus est nobis. Gręce
studebit. Iuvenis est elegantissimus simulatque obsequentissimus. Det
dominus, ne expectationem probissimi parentis fallat.
Fratres nomine nostro iubeas salvere plurimum, Pellicanum,
Myconium, Leonem Iudam [!], et pro nobis ora dominum.
Argentorati 7. Martii 1526.
Vuolfgangus Fabritius Capito tuus ex animo.
Uxorem tuam et prolem, qua te dominus benedixit, opto valere
in domino. Gratulor tibi testimonium domini; nam hinc apparet, dominum
contestari, se tuum coniugium approbare, qui meum fortassis
reiecit, tametsi obsequentis atque ingenii placidissimi uxor contigerit.
Huldericho Zuinglio, episcopo vere Tigurinorum,
fratri ac maiori suo in Christo observando. - Zürich.