466

<< Nr. 465 | Index | Nr. 467 >> 

Absender: Oecolampad, Johannes

Empfänger: Zwingli

Ort: Basel
Datierung: 9 IV (1526)

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 559-560

--559--

Gratia Christi tecum. Mi frater
Probatur mihi strategema, quo adversarius fatigandus. Acutum
quidem telum et, si esset, qui perite ac fortiter in hostem vibraret,
valde utile commonstrasti. Nam hoc unum perpetuo habent in ore:
Habemus verbum [Matth. 7. 15]: ῎Ενδυμα τών προβατοσχήμων λύκων.
Ferunt ii, qui a Wittemberga huc veniunt, Suevorum "Syngramma"
in vernaculo sermone denuo illic excudi, una cum expositione Lutheri
in sextum caput Ioannis. Venerunt autem nuper Erhardus Hegenwaldus
et Slesita quidam. Illum nosti, et olim suis coloribus
depinxisti; rediit titulo doctoris insignitus. Hic vero candidus homo
est et, quantum mihi videor, sinceri iudicii; propediem te inviset, et
mira tibi περί τοῦ γραφοτυράννου nunciabit. Papistas probe imitari
incipiunt. Libros nostros excludunt, ut sui soli legantur et parte adversa
non audita vincant. Ut autem ad hoc, quod dicere volebam,

--560--

redeam: utile videtur expectare et differre responsionem nostram,
donec videamus, quid Martinus dederit. Interim fortassis et disputatio
celebrabitur, de qua frequens hic mentio, sed mihi videtur
periculosissima. Non quod causę diffidam, sed quod locus suspectus
et minime aptus, pręsertim illo tempore, quando confluit licentiosissima
hominum turba in thermas. Nec ignoro fidem et plurimorum animos
in nos, qui, si veritatem discere voluissent, non exclusissent tanto
tempore pios monitores. Cęterum fidendum erit Christo, indicante
die consilium, prout gloria Christi exposcet. Ubi certius aliquid de
disputatione cognoveris, fac quamprimum mihi significes. Basilienses
mei tardius mihi indicant, quod scire in rem meam foret. Nec obticeas,
si quid me facere voles. His diebus pascalibus plebs cecinerat
Psalmos, sed prohibita a magistratu. Recreavit papistarum
animos, quos communicantium nobis numerus plane confecerat. Sed
gaudebunt ad momentum.
Vale.
Basileę 9. Aprilis.
Saluta Pellicanum cum ceteris fratribus.
Tuus Oecolampadius.
Huldrico Zwinglio, Tigurinorum doctori christianissimo, fratri suo.