476

<< Nr. 475 | Index | Nr. 477 >> 

Absender: Zwingli

Empfänger: Vadian

Ort: (Zürich)
Datierung: 11 V 1526

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 585-586

--585--

Gratiam et pacem per Christum.
Hoc scribere possum, per occupationes me nihil posse scribere.
Capita hęc accipe: Faber scripsit adverus priorem epistolam meam,
qua profectionem ad Baden nego. Ibi hominem longe magis ludicre
accipio, quam prius unquam. Clarona prędicatum vult euangelium.
Si quis episcopus legem eam contempserit, in exilium relegator, nisi
veniam petat, quę una tantum vice dabitur. Contra vim euangelii nec
sibi pręcipi quicquam patientur nec aliis pręcipient. Si disputatio
Badensis quid pariat, quod verbo domini repugnet, non vult populus
quicquam de illo vel rogari vel pręcipi. Foedera omnibus ex
fide custodient. Si Tiguro vel cuiquam pago vis fiat, ei auxilium
pręstabunt, qui vim passus est. In provinciis iudicandis hoc servabunt,
ut, ubicunque Tigurini non adsidebunt, nec ipsi adsideant. En
tibi quod sudavimus! Fridolinus Beldius, vir supra modum
sagax et eloquens, consilium dedit; difficulter vicit hęc sententia,

--586--

XX tantum votis. Rumpuntur Madio-Schudii et id genus auri
voragines. Minantur nova comitia, sed nequicquam, si modo deus
pergit esse deus, quomodo hactenus fecit. Custodiat vos dominus a
malo [Ps. 121. 7]. Sęnatus noster negat me disputationi Badensi.
Ipse liberam, sed blandam epistolam scripsi ad hęc comitia. Lucerna
ista, quę paulo minus quam tenebras lucet, audax est et pręterea nihil.
Saluta amicos omneis. Si quid novarum rerum rescietis, meo
sumptu transmittite; nunc enim vigilandum est, ne somniculosis aliquid
incommodi obrepat.
Vale per Christum Iesum, dominum nostrum.
11. die Maii M.D.XXVI.
Huldricus Zuinglius tuus.
Libellos istos amicis distribue! varii sunt, nec idem genus omnibus
missum.
Ioacimo Vadiano, Sanctogallensium consuli,
domino suo observandissimo.