531

<< Nr. 530 | Index | Nr. 532 >> 

Absender: Capito, Wolfgang

Empfänger: Zwingli

Ort: Strassburg
Datierung: 26 IX 1526

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 724-725

--724--

Gratia tecum, charissime frater.
Malam gratiam Bucerus interpres Pomerani iniit. Nam antequam
Pomeranus per ineptam illam epistolam ad Slesium quendam
scriptam declararet perspicuę veritati eucharistię se adversari,
vertit hic psalterium illius et in Psal. 111. [Ps. 111. 5] quędam de
eucharistia non absurda quidem illa, sed paulo obscuriora latius, quę
scripta erant, explicuit, unde videtur Pomeranus stare pro veritate.
Quę, indignitas illi intolerabilis apparet ac modis omnibus repellenda.
Proinde orationem scripsit gravem ac querulam, qua reum agit suorum
librorum depravatorem Bucerum. Ridiculam videbis tragoediam.
Nam modo Bucerus in publicum causam dicet, non sine deo, opinor.
Pudet me vicem istorum, qui se tantopere produnt: diminuendo nomini
ac famę crucis praedicatores timent. Non quod excusem Bucerum,
qui stultus putavit serio scribere, quod Pomeranus oblique scribebat,
nempe permissum esse Bucero, ut mutaret atque [?] aliter interpretaretur
ac enarraret pro arbitrio. Quę verba civilitatem mutuam
requirebant, scilicet ut hic noster illi rescriberet: Indoctior sum, quam
quod ausim vel iotam de tuis mutare [Matth. 5. 18]; quin bene mecum
agitur, si suffecero, quę dixisti prior optime Latinis auribus, in Germanam
ceu coloniam traducere non pessime. Istud esset candoris theologici.
Iam vero rusticus noster simpliciter accipit, quę rhetorica figura
in aliud dicuntur, commutat, variat, vertit invertitque omnia, quatenus

--725--

plebeium lectorem putavit referre. Atqui tum maluissem, suas sententias
seorsim exposuisset lectori, sed obsequi noluit, confirmatus
permissione tam syncęra. Ergo apologia apologiam pariet, qua dubiis
lectoribus ob oculos fumus spargetur. Videbis masculam responsionem
etc. Ioannes Rhodius uxorem duxit apud Phrisios. Veritas
eucharistiae passim nota est. Turcam felicissime pugnare nunciant.
Det dominus, ut ea calamitas nostrorum superbiam humiliet.
Fama hic est Badensem disputationem ędendam depravatam praefatione
ac peroratione scribae Lucernani. Verum efficax veritas
facile prorumpet ex stupeis eiusmodi vinculis. Catabaptistę nonnihil
turbarum dant, qui brevi, ut videtur, evanescent. Neque plus habent
firmamenti, quam panaceus deus papistarum, qui quidem in horas expirat.
Nihil Lutheri videmus. Postquam minis et contumeliis nihil
proficit, videtur se in silentium abditurus. Erasmus epistolam iratam
ad me scripsit, cui nihil respondeo, ne senem irritare videar,
qui Witenbergensium frater est et vos tanta diligentia symmystas
ex albo piorum eliminavit. Philippus fertur non dissimulare, quod
Lutheri acrimoniam in Erasmum, utpote virum optime meritum de
bonis literis, parum probet. Nulla amplius ratio pietatis; bonae literae
totum fundum existimationis possident. Nos vero admirabimur eruditionem
cum pietate coniunctam.
Vale in domino, charissime frater.
Argentorati 26. Septembris anno 1526.
Vuolfgangus Fabritius Capito.
Huldricho Zuinglio, episcopo Tigurinorum, charissimo suo fratri.