530

<< Nr. 529 | Index | Nr. 531 >> 

Absender: Oecolampad, (Johannes)

Empfänger: Zwingli

Ort: Basel
Datierung: 24 IX (1526)

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 722-723

--722--

Gratiam et pacem per Christum. Charissime Zwingli
Hodie mihi oblatus est libellus iste Strussii, turbulenti hominis
et non minus arrogantis, quam ad contentiones et disturbia nati. Suis
clamoribus Marchionatum Badensem diu moratus est, quo minus
vere agnosceret, quid de cena domini debeat sentire. In te magis
insanit, in me vero mitius. Ante aliquot menses, quum minaretur se
scripturum, bene illi volens monui, ut alio se verteret, siquidem scribendi
animus esset; nam huic provincię impares haberet humeros.
Quod ille sic interpretatus est, quasi formidem ipsum. Unum in libello
meo carpit, quod asseruerim, nihil novi in eucharistia fieri, quod mentis
humanę captum excedat, quod exponit, quasi panis dominicus nihil
discriminis habeat a vulgari et communi pane. Declinavit tamen, ne
in me scriberet diffusius, sed totus in te vehitur. Operęprecium fuerit
paucissimis illi respondere, imo non illi, sed Marchionatui Badensi
quamprimum consulere. Pridem caverunt nimirum illius opera, ne
lucubrationes nostras sub principatu illo vendere liceret. Quęrendus
erit aditus. Absoluti erimus ab omnibus maledicitis, si ostendatur, quomodo

--723--

modo scripturam ille contra se non dissolvat et pro nobis stare sinat.
Unde futurum, ut in ipsum omnia convicia casura sint.
Pręterea nihil hic novatur. Pestis nondum cessat. Quantum
incommodi ex fulmine civitas acceperit, alii, opinor, indicarunt. Lapsum
enim in turrim, in qua sulphura, salpetrę, pulveres et alia quędam
ad belli usum pertinentia, turrim a solo funditus evertit et cum
iusta parte muri disiecit vicinosque vindemiantes perdidit, animas
opinor xviij, ita ut admoneamur turris Siloe [Luc. 13. 4]. Sunt et
multi lesi, et domus plęręque in suburbio graviter vexatę. Benedictus
sit dominus in omnibus operibus suis. Pellicanum meo nomine saluta
et precare illi felix coniugium.
Quid si alius quispiam isthic tuo nomine impudentem Strucionem
[!], prout meretur, dedolaret? Id mallem, quam quod ipse responderes.
Expectabis enim, quid Lutherus prolaturus sit.
Vale.
Basileę 24. Septembris.
Tuus Oecolampadius.
Marchionis si mentionem feceris, curabis, ut non irritetur adversus
reliquos pios; multos enim fovet exules, quos nemo hactenus hospitalitate
pari tractavit. Hęc tu omnia prudens expedies, quam ego monere
possim.
Vale iterum.
Domino Vldrico Zwinglio, fratri suo charissimo,
Christum Tiguri purissime docenti.