533

<< Nr. 532 | Index | Nr. 534 >> 

Absender: Comander, Johannes

Empfänger: Zwingli

Ort: Chur
Datierung: 2 X 1526

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 729-730

--729--

Gratiam et pacem per Christum, charissime. Urget temporis
angustia, ut vulgariter tecum loquar.
Ich hatt langest zuo dir geschriben von der comunion wägen, wie ir
zuo Zürich mit den krancken üch hieltind. Und ietz muoss ich aber einest
schriben; ursach, das der sterbent by uns inbricht. Ich hann die meinung,
das des herren nachtmal oder eucharistia inn der gemein gehalten gnuog=
sam were, so man 's zum jar offter begienge, und bedörffte der gesünderten
nüt in den hüsseren von der krancken wägen, so sy doch in der gemein=
same wärind. Ouch ist minß bedunkens die comunion der krancken von
den bennigen herin gefuert, die durch ein fleischlich und unchristlich leben

--730--

ussgeschlossen, und so sy mit dem todt angefochten, widerumb inn die ge=
meinschafft der glöubigen getrungen und mit der communion bezüget und
geoffnet, das sy nit als die ussgeschlossnen und verdampten nach irem tod
ouch gehalten wurdind. Und uss dem sye herkommen, das man dz brott
der sterbenden ze dienst habe inverschlossen, so sy usserthalb der mäss nie=
man consecrieren liessen. Und darumb hab ich nun uff die communion
der gantzen gemein getrungen und inn denn hüssern by den krancken nüt
anders denn allein das wort gottes ze trost und underwysung gebrucht.
Jetz aber so kommen ordnungen von Basel und Costentz, wie sy die
eucharistia by den krancken handlen, und das läsen die unseren, und
wellenß ettlich ouch han. Und in der gemeind ist es noch nit uffgericht,
und stäcken also in angsten, dz ich gantz betruebt bin. Dann mich be=
dunckte vil gemässer der geschryfft und ordenlicher, man bruchte kein privatam
eucharistiam; es wurde die bennigen wol vil harter bewegen und
erschrecken, ouch die comunion vil in grösserem ernst behalten. Doch wil
ich warten uff die bescheidung, wo ich irrete hierinn, dz du mich wysest.
Gott sy mitt dir und strecke dir din leben, unß kleinen und übel=
berichten zuo trost und underwysung.
Ex Chur 2. die Octobris 1526.
Tuus Ioannes Comander.
Doctissimo ac piissimo viro Huldricho Zuinglio,
fratri suo observando.