534

<< Nr. 533 | Index | Nr. 535 >> 

Absender: Oecolampad, (Johannes)

Empfänger: Zwingli

Ort: Basel
Datierung: 6 X (1526)

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 731-732

--731--

Gratia et pax a deo patre per Christum. Dilecte frater
Venundatur hic blasphemiarum et maledictorum Ioannis Fabri
liber, qui nescio, an tibi redditus sit. Nihil impudentius usquam prodiit,
planeque refert insanię Badensis speciem. Quid tibi faciundum
sit, meo consilio non eges. Spiritus enim domini suggeret. Nisi bestia
illa in omnibus aulis obambularet, contemnenda foret plane. Quis
enim falsario publico, tam aperta mendacia obtrudenti, animam suam
crederet, nisi qui decipi velit? Ei enim dignum obtingit operculum.
Porro, quum laboret in hoc, ut ego a te dissentire videar, et quędam
de invocatione sanctorum a me concessa asserat in Badenn, statui
libello edito ecclesię meę rationem reddere. Scio enim, nos multis
temporibus non dissensisse in ullis ecclesię dogmatis. Fortassis et alia
quędam obiter refellam, siquidem nos gratia domini non dereliquerit,
ut incommodus liber Fabri commodo nobis sit. Literas ab amicis
Argentinensibus non potui citius ad te mittere. Vereor, obscuriores
litteras Buceri, quam ut intelligas. Itaque ille noster est
Iacobus Sturmius, senator Argentinensis. Adversarius autem

--732--

infensissimus est Faber. Vides item, quid non attentet ad perdendos
nos.
Tanto impetu Turcus [!] urget, et nihil curę erat principibus,
quam ut pauci quidam euangelizontes pessundarentur. Sunt, qui
Turcam existiment a papa adiutum et in Hungaros evocatum coniecturamque
habent ex moneta Rhomana, quę in castris Turcicis
militibus dispendatur, et quod Turcicę machinę, victo Gallorum
rege, in castris papę repertę, et quod interceptus papę ad Turcam
legatus. Sed incerta illa sint. Bella Italica satis docent, num pro
parte Christi stet, et maxime, quod satellites eius in euangelium
Christi ita sęviunt. Nondum pestis desiit, quam audio et isthuc proserpsisse.
Vellem studiosos maxime primum pręservativa non contemnere
et deinde absque metu agere. Nam hic potissimum perierunt
meticulosi et salutis suę contemptores. Si dissuades, ne Fabro respondeam,
fac sciam; et si librum nondum accepisti, mittam. Credo
autem, quod pridem amici miserint. Struthio responsum esse aiunt,
et Carlstadium a concionibus esse in Tauberna Rottenburg.
Saluta Pellicanum, Myconium, Leonem et reliquos fratres.
Vale.
Basileę 6. Octobris.
Tuus Oecolampadius.
Huldrico Zwinglio, ecclesię Tigurinę fidelissimo doctori,
fratri suo.