541

<< Nr. 540 | Index | Nr. 542 >> 

Absender: Capito, Wolfgang

Empfänger: Zwingli

Ort: (Strassburg)
Datierung: 17 X 1526

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 749-752

--749--

Gratiam Christi.
Degustato libello Struthionis Badensis respondendum videtur,
non hominis gratia, qui hinc insolescit, sed propter causae patrocinium,
cui deesse non poteritis. Scripsit enim pro captu suo satis feliciter,
id est in causa desperata non pessime. Inconstantiam tibi et mutatum
nomen exprobrat, qui pro Zuingly Zuinglius; et quod a me in
literis ad ipsum nominaris Christi minister, apostolus et forte fidelis
electumque dei organum nominaris, id urit hominem scilicet invidię
oestro excecatum. Locuples ipse argumentum est respondendi. Vitę
institutum et nomen commutavit: nuper factus est doctor Iacobus ex

--750--

fratre Iacobo. Dominicalis enim fuit, et nescio quod in sectas commutatus
de censibus inconstantissime scripsit. Fac Leo noster
libellum, qui extat, legat! Inveniet contra scripturam et publicam tranquillitatem
hominem pronuntiasse. Is Isnacis capitis reus agebatur
ob plebem motam; precibus Lutheri donatus est per principem
Saxonię. Moniti feruntur Badenses, ut sibi ab eo, tanquam a
pestilentissima noxa, caveant. In Badensium Thermis hac ęstate
quidam Saxo, clarus, ut aiunt, imaginibus, palam nebulonem contumeliae
causa vocitavit et crimen aliquod in illum se probaturum
affirmabat. Fertur turbatis agricolis dixisse: "Es wurt nit mer gelten
hertzog Hanß, funder bruder Hanß". Libellus eius de eucharistia
assentatio est: Witenbergenses, quos antea lividus mordebat, demereri
studet. Huiusmodi leni articulo forent obiicienda, tanquam
fama autore ac rumoribus vulgi didicisses, sic tamen, ne te autorem
constitueres; nam molliores sunt, a quibus ea accepimus, quam quod
testificari velint, etiamsi verissima sint. Atqui des operam, mi
Zuingli, gravitate ac moderatione, habita ratione quid te deceat,
peragas fabulam illam. Scribitur ad me placidum vestrum tractandi
genus profuisse plurimum. Nolim tamen quiddam decedat modestię
gratia veritati. Praeterea libellum ęditum ad nos des cum literis ad
principem Badensem, quibus rogabis, ut ius fiat tua atque Oecolampadii
publice vendendi. Nos omnia perferenda studiose curabimus.
Fucus iste diu molestus non erit, quamlibet blandis officiolis
quosdam sibi devinciat; nam pulchre incipit, si vera scribunt amici,
demereri adversarios. Utraque sella excutietur.
Lutheri "Sermones" in nostro conventu legimus in confirmationem
dubitantium fratrum, quos evanidis illis ratiunculis abs se absterret
prorsus. Quidam ex his, mediocris venę homo: Si legit, inquit, quę
Zuinglius et Oecolampadius toties scripserunt, vehementer contumeliosus

--751--

est; si non legit et adeo damnat incognita, superbissimus.
Certe aliud dicere nequeo, quam quod hominem vehementer producat.
Tractandus est virili pręsentia, sed tanquam frater, quamlibet nos tradat
iratus Satanę. Ex spiritu domini sunt, quę interim docet de
gratia, lege, euangelio et id genus, ex carne autem, quę contra de
miserabili pane suo destomachatur. Bile incita mens - meliora
nequit. Commiseratione itaque dignus, quam odio, potius videtur.
Age candorem praestes, veras dotes hominis agnoscas ingenue, et
quid in hac causa humanitus patiatur, ostende suaviter et, ut soles,
perspicue. Ab odiosis interim abstine, sicut de origine motorum agricolarum,
de intolerabili arrogantia et id genus. Nam omnino praestet,
ut ceu sanabilem tractes. Capita tibi oculatissimo frustra indicarem
et spacio excludor. In missam omnes machinas iterum dirigemus, quę
argutissimo commento, ceu tibicine, his diebus subfulta est; ruet tamen
Christo auspice. In vitia publica interim propius animadvertetur.
Magistratum in dies robustiorem dominus dabit. Exhilaravit nos
maiorem in modum frater iste, ex quo de spiritu tuo eximia cognovimus,
et forte augustiora coniecimus, quam referre sufficeret. Benedictus
dominus, qui det, ut isto tenore consumas. Ecquid probas, quę
in Fabrum fabricavimus? Probasses forte, si conventus principum
de subito non desiliisset. Ea enim causa ratio nostra tota inversa est.
Fortissimum sensisset antagonistam, et erant idonei adiutores parati.
Vale xvij. Octobris anno 1526.
Vuolfgangus Capito.

--752--

Leonem et fratres omnes in domino salutes! Vicissim, si
quando (ut soles) vulgaria scripseris, omnes nostros comministros ex
te iube salvere: huiusmodi officiolis infirmi retinentur. Alioqui quę
prodi nolis, privatim indices
Uxorem tuam, sororem probatissimam, ignotam licet a facie nobis
absentibus, optamus in Christi cognitione pergere, qui[!] in te
Christo nupsisse videtur. Comministra enim est verbi, quę tali servit
apostolo.
(Adresse fehlt).