574

<< Nr. 573 | Index | Nr. 575 >> 

Absender: Gynoraeus, Petrus

Empfänger: Zwingli

Ort: Augsburg
Datierung: 14 I 1527

Vorlage: Huldreich Zwinglis sämtliche Werke, vol. 9 (Leipzig: Heinsius, 1925) (Corpus Reformatorum 96), 16-17

--16--

Gratiam et pacem a deo patre per Christum.
Quum nil aliud in manus veniat, charissime Huldrice, quo te
honorem, cogor tandem eiusmodi tibi exhibere strenam, quam in horum
comparavi officina, qui monstris quam hominibus similiores, ac penes quos
maledicere, calumniari ac blasphemari [!] gloria haud exigua. Accipe
igitur duos hos ab amico strenae vice libellulos admodum inimicos ac,
ubi a studiis vacarit severioribus, eis sesqui horam impertito, quorum
alter Andream Althamerum autorem clamat, alter vere deploratae
vanitatis monachum Thomam Murnar artificem praefert - quanquam
non desint, qui communem operam tribuant Eckio aliisque
eiusdem farinae nugatoribus. Equidem non alia ratione huiusmodi

--17--

tibi mittere soleo virulentias, quam ut facilius, ubi commodum fuerit,
refellere queas, idque in tempore, vel alte contemnas, dum videris
indignas, quibus respondeatur. Caeterum quid tibi scribam de rebus
meis? quae sane peiore loco esse non possent, nec video, quo pacto
emendari queant. Tu mei fac memor aliquando sies. Senatus inhibuit,
ne Murnari libellus publice Augustae vendatur.
Vale.
Raptim. Augustae Vindelicorum 14. die Januarii 1527.
Leonem nostrum item et Pellicanum impense meo nomine
salutato. Grymius vicissim plurima vos omnes salute impertit.
Petrus Gynorius, tuus ex animo.
Clarissimo viro domino Huldricho Zuinglio, Tigurinorum
episcopo, fratri charissimo - Zurich.