59
Absender: Rhenanus, Beatus
Empfänger: Zwingli
Ort: Basel
Datierung: 13 II 1519
Vorlage: Huldreich Zwinglis sämtliche Werke, vol. 7 (Leipzig: Heinsius, 1911) (Corpus Reformatorum 94), 136-137
--136--
Beatus Rhenanus Huldericho Zinglio suo S. D.
Ex Augusta Vindelicorum Capitoni nostro scripsit Io. Oecolampadius
Lutherium extra Wittenbergam pedem non movisse.
Scripsit pro hoc ad cardinalem s. Syxti Saxoniae dux Fridericus
literas deprecatorias. Frobenio significari cures, chartaceis ne tabulis
libros suos concinnari velit Sanderius, et in quot volumina
dividendus sit Hieronymus. Quod si ex singulis tomis singula volet
habere volumina, concinnationis pretium ad 4. florenos et dimidiatum
redibit. Tantum solvit Puccius. Non possunt ingentia volumina
--137--
tenues asserculi sustentare, nec chartaceae tabellae praegrandibus
libris pares sunt. Novi iam pridem eius animum, cui compendium
inscriptum est; sed Christianum mihi videtur τους ἐχθροὺς διὰ τῶν
εὐεργεσιῶν φίλους ποιεῖν. At τῷ σταυροφόρῳ ne Pytho quidem ipsa
persuaserit, ut a Scoto vel transversum unguem discedat. Audivit a
nobis multa in hanc rem disputata, cum illi contubernio hic coniuncti
essemus. Osualdum Myconium salvere iubebis et rogabis, ut "Compendium
verae theologiae" suis auditoribus hoc quadragesimali tempore
vel alioqui festis diebus interpretetur. Nihil agere potest, quod
vel Christo sit gratius, vel sophisticis nugis pernitiosius. Curabimus
"Paraclesim" in hac item forma typis excudendam, ut ante compendium
legi possit velut adhortatio ad Christi philosophiam.
Bene vale.
Basileae 13. Februarii anno M.D.XIX.
[Exi]mio viro dn. [Hulderi]cho Zinlio [ami]co
[incom]para[bili]. Thuregii.