598

<< Nr. 597 | Index | Nr. 599 >> 

Absender: Wirt, Adrian

Empfänger: Zürich, Bürgermeister und Rat

Ort: Stein am Rhein
Datierung: 13 III 1527

Vorlage: Huldreich Zwinglis sämtliche Werke, vol. 9 (Leipzig: Heinsius, 1925) (Corpus Reformatorum 96), 69-70

--69--

Gnad unnd frid durch Christum Iesum etc. Strengen, frommen,
vestenn, fürsichtig, ersamen, wysen
Ewer strenng, ersam wysheit sygind min underthenig, gantz gevlissen,
wyllig dienst bevor. Gnedigen herren unnd guot frünnd, ir sind on zwifel
ingedenckh, wie ich zuo mer malen euch, mir gnediglichen mitt etwas diensts
by euch ze underhelfen, flißglich angesuocht. Wiewol mir nün deshalb
richlich zuosagung beschehen, so hatt mir doch biß daher nüntz gmögt
dhyhen unnd verlangenn, darumb ich uff grosser not geursacht worden,
min vätterlichs erb, wellchs ouch warlich gringer, wann jemant vermeint,
anzuogriffen, damitt mich, mine lieben wyb unnd khinder, vonn hungers
not errett. Unnd dwyl dem also, so vermanen ich abermals unnd bitten
euch unndertheniglich mitt höchstem flyß, ir wellind nachmals myn in=
gedenckh syn, ansehen unnd zuo herzen fassen myn nott unnd armuot, unnd
dennocht bedenckhen, was mir unnd den mynen durch abgang unnsers
geliepten vatters unnd bruoders widerfaren unnd beschen; dann wo die
noch in leben, solten ir des von mir wol überhabet syn. Darumb so

--70--

wellindt mir, der syn bedarff, helffen unnd etwas diensts, dardurch ich
mir, mynem wyb unnd khindern, zimliche narung beckhommen möcht, er=
volgen lassen. Das würt euch der rych, guettig gott unvergolten nit
lassen. Man hilfft sunst etwan undanckhparn lüten, an denen es ver=
geben; by mir sol aber diser guotthatt nümen vergessen werden. Der herr
syge mitt euch. Ich bitt euch ouch hiemit, ir wellind mir diß myn
schriben nit verargen; wann mich not unnd armuot darzuo gepracht.
Datum zuo Stain, Mitwochen nach dem Sontag Invocavit
anno etc. 15 xxvij.
Ewer strengen, erßam wyßhait undertheniger
Hadrian Würt.
Dem strengen, frommen, vesten, fürsichtigen, ersamen, wysenn burgermeister
und rhatt der statt Zürich, mynen sonders gnedigen lieben herren.