642

<< Nr. 641 | Index | Nr. 643 >> 

Absender: Oecolampad, Johannes

Empfänger: Zwingli

Ort: Basel
Datierung: 18 VIII (1527)

Vorlage: Huldreich Zwinglis sämtliche Werke, vol. 9 (Leipzig: Heinsius, 1925) (Corpus Reformatorum 96), 189-190

--189--

Gratia et pax Christi.
Mitto hic tibi, frater, quę in primum caput Ezechielis ad Hessorum
principem scripsi. Tu vel tui legito et, si quid desideretur,
ut non dubito multa desiderari, indicanto, ut posthac instructior et
certior scribam. Est enim in Sphingibus illis periculum.
Hodie sub prelum dedi, quę contra catabaptistas, in qua tui
mentionem facio, quam charitas exigit.
Fama est combustum Baltassarem; sed vivo illius libro nobis
tacere non fas est, donec et ille igne verbi in cineres eat.

--190--

Pyrkaimerus tercio in me scribit, ut narrat is, qui literas reddit.
Quid nunc ille allaturus? Quanta iterum confinget crimina?
Vix merebitur responsum, quicquid scripserit. Sed miseret me interim
tam pręclaram civitatem tanta tyrannide opprimi. O ἀνόσιον
Osiandrum! Reliqua tabellio dicet, quem oro fratribus commendes,
si fortassis isthic, vos audiens, aliquandiu hęrere queat.
Fratres Argentinenses Wormaciensibus idoneum ecclesiasten
miserunt, Fontanum quendam.
Ulmę interdictum papisticis concionatoribus, qui rationem doctrinę
suę reddere noluerunt. Hoc nulla ratione a nostratibus impetrare
possumus, sed nosti, quid obstet; fortassis aliquando respiciet nos
dominus.
Parum valere corporibus et Bucerum et Capitonem audio, non
tamen peste correptos. Non sine ira domini tanta lumina nobis ante
diem extinguerentur. Deus te nobis diu conservet
Vale.
Basileę 18. Augusti 1527.
Tuus Oecolampadius.
Huldrico Zwinglio, suo charissimo fratri.