695

<< Nr. 694 | Index | Nr. 696 >> 

Absender: Haller, Berchtold

Empfänger: Zwingli

Ort: Bern
Datierung: 10 III (1528)

Vorlage: Huldreich Zwinglis sämtliche Werke, vol. 9 (Leipzig: Heinsius, 1925) (Corpus Reformatorum 96), 379-380

--379--

Gratiam et pacem a domino.
Guolfgangum e Glarona proscriptum, charissime Huldrice,
Bielam misi, ut si illic Iacobum Wirben iuvare posset. Nam
magistratum nostrum Bielenses omnino imitati sunt, dirutis ex fundo
altaribus et imaginibus, unde, Iacobus quottidianis contionibus cum
praeesse nequeat, per Nicolaum Wyttenbach ipsum amandavi, nec
dum intellexi, mansurusne sit aput illos, nec ne. De Sebastiano
et Rellicano quid actum sit, ipsi scribunt. Non deero illis. Hoc
unum novissime neglexeram: Idolum Marię in Bürren, quod ultra
30,000 u corraserat abortivorum et mortuorum infantium baptismo,
palam, omnibus e cęlo signa sperantibus, ante templum a Nollio

--380--

legato combustum est. Interim misit Capito libellum quendam, cui
titulus absque auctoris et typographi nomine talis erat: "Nüwe zytung
von iecz gehaltner disputation ze Bern." Suspicamur omnes Coclei
opera excusum; nam is ad octiduum ferme suum habebat famulum
aput nos. Ad nundinas illas Franckfordianas singulis responsurus
est Capito. Interim de 4 exemplaribus nihil sollicitus sis. Nam
ubi Christophoro datum fuerit, excusa iam exemplaria, et si non
ad finem, ad nundinas vehere, cur non et illi liceret, quattuor tibi
dare, modo sic agas, ut una hepdomada simul invulgentur, ne nostrates
praeveniantur. Nihil nunc habeo, quod scribam, quam ut felicissime
valeas cum uxore, liberis, familia, fratribus totaque ecclesia. Cętera
Tunensis scriba indicabit.
Vale rursum.
Bernę X. Martii.
Tuum ex animo minimum nummisma.
Heinricum Lincki ex Schaffhusia ad Brugg promovimus,
modo plebis suffragio id fieri possit.
Huldrico Zuinglio, ecclesiastę Tigurino, maiori suo in domino
summe observando.