712

<< Nr. 711 | Index | Nr. 713 >> 

Absender: Capito, Wolfgang

Empfänger: Zwingli

Ort: Strassburg
Datierung: 15 IV 1528

Vorlage: Huldreich Zwinglis sämtliche Werke, vol. 9 (Leipzig: Heinsius, 1925) (Corpus Reformatorum 96), 424-425

--424--

Gratiam et pacem. Charissime frater
Dici non potest, quantum prosit irati Lutheri petulantia. Nam
amicos, quos personata illa autoritate hactenus detinuit, offendit graviter,
confirmat nostros. Hessus in hoc fuit, ut coram Oecolampadius
et Bucerus causam agerent. Sed nova turbatio principum
intercessit, quam opto et spero feliciter desituram. Pace reddita
videtur congressio futura. Te putant fines Elvetiorum temere non
egressurum, quem ob bene facta malorum hominum acerbissima odia
observant, et fortassis impotentem adversarii animum magis exacerbares
coram agens, qui absentis moderato stilo tantopere exasperatur.
Magna principes moliuntur. Hessus Nornbergę nuper fuit, equitibus
tantum quatuordecim comitatus. Causam facile suspicis. Agitur
causa ducis Wirtenbergensis, quo patrię reddito bene sperandi
materiam nobis obiectam putarem. Facile cum vestratibus coalesceret
exilio diutino multatus princeps, cui sustinendi essent tot adversarii.

--425--

Unum orant amici omnes, hoc est: principes et proceres rerumque
publicarum magistri, qui tuę parti favent, ut Luthero responsurus
tui sis memor neque sinas te hominis improbitatem agere transversum.
Nam retaliando pessima commeritum magis ornares, qui sua nefanda
et prolixa maledicentia sibi uni potissimum nocet. Et tamen artes
perspicuis notis declarandę sunt, quibus inficere tentat veritatem;
deinde, si quid verisimiliter respondet, refutandum, postremo vulgaribus
lectoribus et crassulis scribendum omnino, qui eruditionis tuae luce,
perspicua brevitate nervosisque argumentis plurimum capiuntur. Equissimum
vero in te animum ex eo cognoscunt ac depraedicant, quod abs
te dissentientem ferre potes; nam ille te devovet, spiritosum et Satanam
ipsum facit; tu contra duntaxat errantem, sed periculose ac protervius
errantem. Bucerus totus in ea modo causa desudat, cui potius
congruit abstergere lutum convitiorum, quam tibi, quem impetiit.
Pręterea si quid in mea parvitate situm fuerit, non deero occasioni,
quę nunquam non aderit. Modo, mi frater, pro animi istius magnitudine
magnifice ipse contemnas muliebriter convitiantem, idque praeter
etiam suspicionem veri; tantum abest, ut queat officere. In humilitate
nostra vincet gloria dei.
Si forte in scribam urbis vestrae Mangoldem [!] et consulem
Resthium incideris, nomine Buceri et meo eos diligentissime salutabis.
Tu quoque vale felicissime cum familia tota.
Soleris, queso te, sepius Oecolampadium, cui nuptias vereor
obtigisse difficiliores, ob rumores hominum, quos tenere patitur.
Argentorati 15. Aprilis anno 1528.
Vuolfgangus Capito.
Huldericho Zuinglio, concionatori Tigurino,
domino et maiori meo observando.