731

<< Nr. 730 | Index | Nr. 732 >> 

Absender: Hedio, Caspar

Empfänger: Zwingli

Ort: (Strassburg)
Datierung: 23 VI 1528

Vorlage: Huldreich Zwinglis sämtliche Werke, vol. 9 (Leipzig: Heinsius, 1925) (Corpus Reformatorum 96), 490-491

--490--

Gratia Christi tecum. Ornatissime Zuingli
Iacobus Kirscherus, maior cancellarius principis Badensis, vir
ob multas eximias dotes plane adorabilis, filium habet apud Oecolampadium,
optimę spei adolescentem, Ioachimum nomine. Hunc cuperet
parens curę alicuius boni viri apud vos committere, ut in discenda
pietate et rectis studiis pulchre acta radice superstrueret vitam inculpatam
et multorum usibus expositam. Hoc cum senex adeo averet,
recepi me scripturum tibi, qui amator es reipublicae et probę puerorum
institutionis. Idcirco, mi Zuingli, hoc a te peto brevibus, ne prolixis
literis morer sancta tua studia, ut significes principio, quam eximios
habeatis istic professores Grecę et Latinę linguę; nam quum adolescens
optimo sit praeditus ingenio, cuperem optimis praeceptoribus elocari.
Deinde, an possit apud honestum civem habere liberalem victum,
liberalem, inquam; nam abominatur parens istos, qui sordide cibant et

--491--

potant studiosos. In hoc paratus est etiam solvere, quod ęquum est.
Tertio, qua pecunię summa convictus, ut vocant, possit comparari. Hęc
ubi inquisieris, non graveris, rogo, ad me scribere; tum equidem patri
adolescentis vel coram referam vel literis reponam. Amęnum est ingenium
et dextrum, proinde tibi ac vestrę iuventuti solatio futurum.
Ceterum quae hic fiant et quę digna tua cognitione, cum Bucerus
ac Capito nostri soleant diligenter ad te scribere, non est, quod ego
te meis literis quoque onerem. Christus te diu servet electum organum
ad testandum euangelium [Act. 9. 15] regni sui.
Bene vale.
Raptim 1528. 23. Iunii.
Caspar Hedio tuus.
Paratissimo dei organo Ulricho Zuinglio,
suo pręceptori adorabili - Tiguri.