745

<< Nr. 744 | Index | Nr. 746 >> 

Absender: Sapidus, Johannes

Empfänger: Zwingli

Ort: (Strassburg?)
Datierung: (Anfang VIII 1528)

Vorlage: Huldreich Zwinglis sämtliche Werke, vol. 9 (Leipzig: Heinsius, 1925) (Corpus Reformatorum 96), 521-522

--521--

Ioannes Sapidus Vlricho Zuinglio S. D.
Adhuc memor sum, mi Zuingli, semperque manebo, donec licebit
mihi inter vivos agere, quod me isthac iter facientem tam honorifice
excęperis, tot novis auxeris amicis, iisque non vulgaribus, sed eruditis,
sed Christianis, id est, quales sibi quisque bonus maximo parare velit,
insuper tot cumulatum beneficiis et dotatum libelis [!] tandem, ęgre tamen
dimiseris, unde, quicquid molestię mihi meisque conatibus in illa
nupera peregrinatione accidit, tu tua pia et amica bonitate extersisti.
Iam non memorabo, quantum mihi accesserit fęlicitatis ex illa morum
suavitate, qua rebus et hominibus ex amussi congruis, ex varia doctrina,
qua nemini cedere videris. Crede mihi, invadit me ingens voluptas,

--522--

dum iam de his scribo. In hoc tamen mihi abs te miser factus sum,
quod, quum tuis meritis respondere non possim, ingratus cogar mori,
nisi forte tum beneficium relatum quoque sit, dum ingenue fatemur,
quod reponamus, non opis esse nostrę. Quare si tu quoque admittis
me ad id genus gratiarum, bene habet, iam tibi nihil debeo. Sed iam
ad alia: Missę sunt ad me aliquod [!] positiones, ut vocant, scolasticę,
quarum copiam tibi facio, ea lege, ut ceteri communes habeant, quos
omnes salvos esse iubeo.
Vale festinantissime.
Huius etiam oblitus: Philippus Melanchthon me certiorem
reddidit res Lutheranas adhuc esse in tuto et vado. Pestis cępit
Wittenbergę.
Vale iterum.
Incomparabili viro domino Vlricho Zuinglio, Tigurinorum
christianissimo concionatori, amico suo Theseo.