106
<< Nr. 105 | Index | Nr. 107 >>
Absender: Brunner, Hans
Empfänger: Zwingli
Ort: (Brugg)
Datierung: 6 XII 1519
Vorlage: Huldreich Zwinglis sämtliche Werke, vol. 7 (Leipzig: Heinsius, 1911) (Corpus Reformatorum 94), 234-235
--234--
Wolglerter, sunders günstiger, lieber herr. Min gehorsam, gneigt
willig dienst zuopor etc.
Alls ich dann in kurczer zit ze Basell bin gewessenn vonn wegenn
mins bruoders seligenn meister Cuonnrats hab unnd henndlung [!] unnd
vil verganngnem, hab ich fundenn ein register, darinn vergriffenn etwas
gelts, darumb er üch buecher hat wöllenn koffen, unnd kofft unnd zalt,
unnd hab so vil fundenn, das ir im 7 sunen kronen hannd zuo geschickt;
doch hat er in einem register, das er dem truckerhernn zum Sessel hat
gebenn 6 kronen; die letst kronen hatt er ouch davon ettwas ußgeben.
Nun mag ich nit wüssenn, ob ir im sidher unnd zwüschenn sannt keisser
heinrichs tag mer gelt hannd geschickt oder nit; wölte ich gernn wüssenn;
dann ich sin hanndell lutter machen wil. Ist min beger, mir verschribenn,
wie es darumb stannd. So dann ist an üwer würde min früntlich pit,
mir annzöig, ratt unnd hilff gebenn ann min gnedigenn herrenn, dem
cardinal vonn Wallis; hatt gehept zwen sins bruoders sün zuo Basell;
sind daselpst zuo minem bruoder seligenn zer ler ganngenn unnd sind im
--235--
bed schuldig lidlonn ein vierteil eins jars, trifft sich 11 rinscher guldin,
unnd törff biderb lüt, die im für geseczt hannd, zefriden stellenn. Unnd
soverr ir mir umb bemeltes gelt am cardinal möchten helffen, wölt ich gar
früntlich und uffs trüwlichest thuonn verdiennen. Lannd üch bevolenn sin,
damit ich mins bruoders hanndell desto fürderlicher möge vertigen.
Datum uff Nicolae anno 1519o.
Der üwer allzit
Hanns Brunner zuo Brugg.
Wöllend mir by dissem bottenn anntwurten.
Dem würdigenn, wolglerttenn hernn Ulrichenn Zwingly, lüpriester [!]
zum grosen münster zuo Zürich, minem sunders lieben herrnn.