107

<< Nr. 106 | Index | Nr. 108 >>

Absender: Hedio, Kaspar

Empfänger: Zwingli

Ort: Basel
Datierung: 10 XII 1519

Vorlage: Huldreich Zwinglis sämtliche Werke, vol. 7 (Leipzig: Heinsius, 1911) (Corpus Reformatorum 94), 236-239

--236--

Salve plurimum. Duo videris in epistola tua sciturire. Principio,
ut succedat annunciatio evangelii secundum Matthaeum.
Audi, mi Zingli, necdum exorsus sum. Quanquam constantissime
decreveram pro viribus illud explanasse simplici turbę, evangelicę
eruditionis capaci. Sed nescio, quis malus genius impedierit, omnem
movens lapidem contra pulcherrimos meos conatus. Nosti ex literis,
quod vicarium egerim divi Theodori. Egi et vigilanter in absentia
doctoris Augustini Lutenwang, qui plebanus erat. Vivente illo
nemo non putavit me illi successurum. Ipse quoque sic eram persuasus.
Ecce moritur. Equidem magnis pręcibus et praxi, fortassis
iis efficatiori, abstinui, volens ceu Aaron quispiam vocari [cf. 2. Mos.
29. 1ff.]. Hoc male habuit cives Minoris Basileę, ad quos spectat
electio. Eligitur ergo alius quispiam, qui multa pollicitus est se illis
facturum, et maiora quam fuerit mearum virium pręstare. Inde factum

--237--

est, ut ego coactus fuerim alio migrare. Accessi Capitonem oblectans
me cum illo aliquot diebus. Accidit ut capellania apud divum
Martinum vacaverit cuiusdam seniculi divi Marci. Offertur mihi
ultro; accipio, quando quieta est et mediocriter ampla, subinde studiis
meis accommoda. Habet enim aedes ęlegantes circa collegium et Rhenum.
Intelligis iam, ubi sim. Tertius dies est hodie, quo sum in novis
aedibus. Omnia alioqui ex animi sententia succedunt. Nondum paravi
me lectioni. Adhuc chaos quoddam in domo mea, nullum sedile. Stans
hec scribo et tumultuanter sine ordine. Deinde quod queris de
"Peste": hactenus malę significantię erat τὸ ὄνομα καὶ σὺ ἐποίησας
μέσον. Mala hec pestis, quę miseros mortales miserrime vexat, et

--238--

bona est pestis Zinglii. De hac quid agatur, scribet ad te brevi
Iacobus Nepos. Ex huius literis intelliges omnem rem. Scripsi
Myconio de suo dialogo quid sentierit [!] Capito. Putat non inconsulto
factum, si adhuc aliquandiu foverit in sinu; se signum daturum,
cum tempus erit omnibus nobis defendendi emergentes literas.
Id quoque Capitoni pręceptum ab Erasmo, qui statim imploraturus
est συμμαχίαν. Iam γρηγορεῖ. Pessime volunt theologi Lavonienses [!]
Erasmo et Erasmicis. Cunctatores oportet nos agere. Datum est
omnibus licentiatis et bachalaureis, ut inquirant in libros Erasmi.
Pax semel inita est, rursus rupta, et verendum, ne pax non sit pax. Si
unquam perniciosius tentatum est in veterem eruditionem et Christianas
literas, dispeream. Armemus pectora nostra! pugnandum erit contra
teterrimos hostes, contra miseram turbam ματαιολόγων. Factus est
syncretismus multorum, et nos oportet συγκρητίζειν. Fabritius
scribet post solennia trium magorum apologiam ad reverendissimum
cardinalem Sedunensem de cultu sanctorum, ubi Casearius, ut

--239--

dignus est, tractabitur. De magistro Conrado inquisivi. Quid
factum rescies ex germano illius.
Vale feliciter cum Erasmo nostro, quem valere opto.
Basileę 1519 sabatho post conceptionis.
Salutat te Capito, cuius literas haberes, nisi prohiberent multa
negocia. Iussit se tibi purgem. Declamat quotidie Paulum ad Romanos
c. 7.
Gasparus Hedio, ὁ σός.
Udalrico Zuinglio, pastori Tigurino, amico incomparabili.