133

<< Nr. 132 | Index | Nr. 134 >>

Absender: Nepos, Jacobus

Empfänger: Zwingli

Ort: (Basel)
Datierung: 17 IV (1520)

Vorlage: Huldreich Zwinglis sämtliche Werke, vol. 7 (Leipzig: Heinsius, 1911) (Corpus Reformatorum 94), 301-302

--301--

S. P. dicit. Dialogum tuum, humanissime domine, antequam
amicos meos inviserem, per bibliopolam claudum miseram. Quem, si
videtur (ut dixi tibi praesenti), remitte! Curabo, ut sub incudem
mittatur. Praeterea Myconii doctissimi viri Φιλείρινον per eundem
remisi. Caeterum, ut ingenue fatear, habebam nonnihil in animo (ut
dominus Ambrosius subindicavit) de mutanda vita; nec erat aliud,
quod me magis moveret, quam humanitas tua, cui adesse desideravi,
eamque ob causam adii quosdam, quos mihi benevolos esse arbitrabar,
ut hoc perficerem. Sed posteaquam video fere neminem praeter tuam
humanitatem mihi ex animo bene velle - vellent enim isti ex me
facere sacerdotem, quo nihil minus unquam speravi - praeterea rei
difficultate perculsus, parum abfuit, quin omnem spem de hac re
abiecerim. Antequam enim literę et prela duo pararentur, ducentis
florenis opus esset, nec minus nongentis florenis unum annum labor
ille continuus petit, et ita, ut video (etiamsi res prospere cadat), essem
servus et mancipium perpetuo. Quapropter tuo consilio fretus hic
dominum meum Erasmum expectabo brevi huc rediturum. Interim
ne nihil agam Gręcas literas docebo, si qui iuvenes adsint. Praeterea

--302--

dominus Heinricus Glareanus his diebus aderit. Dominus
Wolfgangus Capito cras hinc abiturus est Moguntiam versus, illic
etiam divini verbi praeconem acturus. Similiter Bonifacius post
duas septimanas Galliam petet, illic mansurus propter studium iuris
civilis aliquamdiu. Biblia Gręca nondum habemus, nec Eusebii
opera. Cyprianus ad te missus est me absente. Hieronymum
Frobenium admonui de operibus sancti Hieronymi, quanquam dicat
se nihil literarum de hoc accepisse. "Paraphrases" iam parantur.
Dominus Beatus nondum rediit, quem indies expectamus.
Dominus Ambrosius brevi tibi adeit, cui committam quicquid
putavero tuum interesse aut meum. Iam sum totus in Homero
Graeeo. Quicquid sit, tuum sequar consilium, aut meam tuebor
libertatem. Dominus Capito me lubenti animo suscepisset; tamen
negavi, ne inconstans tibi videar. Nihilominus utere me pro arbitratu
tuo, et ego semper ero morigerus. Si tuum consilium est, quod desistam
ab hac re, quam volebam, nec potes commode id amicis negare, dic
me abisse, necdum redisse. Habes, quid velim, utcunque.
Vale unicum praesidium meum.
Te atque amicos tuos omnes bene valere cupio.
Decimo septimo Aprilis.
Famulus tuus deditus Iacobus Nepos.
Doctissimo domino magistro Vdalrico Zinglio,
divini verbi praeconi. - Tiguri.