147

<< Nr. 146 | Index | Nr. 148 >>

Absender: Glarean

Empfänger: Zwingli

Ort: Paris
Datierung: 7 VII 1520

Vorlage: Huldreich Zwinglis sämtliche Werke, vol. 7 (Leipzig: Heinsius, 1911) (Corpus Reformatorum 94), 331-334

--331--

Zinglio suo Glareanus S.
Veni Lutetiam non omnino salvus, suavissime Uldrice; nam
Gryllus, equus meus, misere mecum ceciderat leseratque testes, ut
mirum intumescerent. Ad haec iter intermittere non potui ob pueros
et expensas. Verum nunc revalesco, cogitabundus sane, quo res
Basileiensis cadat. Tu si quid inaudieris, ubi haereat, et quis
remoretur, tum si quid ad articulos addendum, mihi, cum erit ocium,
rescribito, enixe oro. Et Bero quidem quantum confidendum, multi
dubitant. Ego certe, quae de eo fama sit, ingenue dixi adiecique, si

--332--

volet negotium impedire, me incipere nolle; neque enim mihi unquam
cum eo contentionem fore aequalem in urbe, ubi sit civis, atque ubi
eius est senatus. Is respondit neque se unquam bonis literis opposuisse
neque impediturum rem meam, immo adiuturum omnibus viribus,
et, ut neque antea ei credam, donec ita omnia inveniam, adiecit.
Habet dominus Felix Grebel quos scripseram articulos certe intra
quattuor horas utcunque consarcinatos, quorum tamen non poenitet,

--333--

si integrum lectorem sortientur. Doleo mihi rem esse cum iis, qui
facilius persuasioni [!] eorum hominum ducuntur, qui multis annis,
cuiusmodi animo sint in rempublicam Basileiensem, declararunt.
Nec tamen ii animadvertunt. Tametsi, ut verum fatear, neminem
vidi, qui contra nitatur, saltem ex civibus; quin omnes gratulabantur
voluntati meae adeo promptae atque benignae. Quod si in urbe Basileiensi
unus contigisset aut alter Zinglius, iam in vado res esset.
Spero tamen omnia recte, praesertim cum civitas Tigurina sua authoritate
accessit, quae mihi semper voluit bene, idque expertus sum
multis annis. - Valentino te facile purgavi; nam coram vidi,
quanta familia oppressus sis. Salutat te S. P. Q. Ro., imprimis vero
quaestor Ursus, Galataeus aedilis, et Herus. Salutabis rursus
nomine nostro secretarium, praepositum, Binderum, Luchsingerum,
Sprossium, Uttingerum, Andream fratrem et imprimis omnes
tecum graecissantes; quod bene vertat iis, deum immortalem precor.

--334--

Futurum auguror, ut Tigurum multis universitatibus non cedat. Sed
uni tibi et immensis laboribus tuis acceptum referri debet.
Vale et me ama.
Luteciae ad Nonas Iulias.
Si literae aliquot, quae Lucernam mittendae sint, in domum
tuam venerint, si tu commode non potes, fortassis Ammanus poterit.
Illudque unum exciderat, ut cardinali me unice commendares, tametsi
hoc absque admonitione, quae tua est humanitas, eras facturus.
Sed iam vale.
Neque enim illi scribere audebam; verum abunde novit ille
Glareanum.
Domino Vldrico Zinglio, philosopho ac theologo vere christiano,
amico nostro summo.